Mo’j is heuren wat doar in un café bie de Iessel un tiedjen elejen is gebeurd. As de luu d’r noe nog oaver proat, heb ze d’r nog schik van. Um de toafel zaten un paar keerls met mekare te ouwehoeren. Ene was nogal un pocherd. Ut maken niks uut of ut noe ’s margens of ’s middags was hee bloazen altied van zich af. Berend had weer merakels praatjes. Hee had zo’n goeie zaken edoan. Weer un bult verdiend en nog meer meer bla, bla, bla. Willem heuren ut weer an dach noe zal hee d’r an. Hee zei tegen Berend: “Ik heb nog un handeltje bie mien. Un beste kniene. Is dat niet wat veur oe? Hartstikke lekker.” Berend leek dat wel en zei tegen Willem: “Loat mien dat beest maar is zien. Ik best zin in un goeie kniene.”
Willem halen ut beesien op. Hee bevuulen ut nog is en ut leek um wel. Berend zei: “Wat vroag ie d’r veur? Zeg is un schappelijke pries.” Hee bleef maar deurpingelen. Eindelijk, noa veul gedram en bieden wörden ze ut eens oaver 10 euro. “Goed”, zei Willem, “dat moet maar veur die pries maar ik doe um wel effen in un deuze en liep d’r mee noa achter.”
Effen later ging Berend op huus an. Hee had d’r schik in. Verduld un beste kniene veur un zeer schappelijk priesjen. De deuze was knap zwoar. Doar had hee un goeie handel mee edoan. Thuus zetten hee de deuze in de schuure. Hee zei tegen zien vrouw: “Ik heb in ut café goeie zaken edaon. Ik heb van Willem veur un snappriesjen un beste kniene ekoch. Zundag ku’w lekker èten. Goa maar is in de schuure kieken. Doar steed un deuze en doar zit hee in.”
Zien vrouw noa de schuure en zag de deuze stoan. Ze worden d’r niet vrolijk van toen zee zag wat d’r in de deuze zat en dach metene: “Wat heb ze Berend weer lillek bie de bene ehad. Natuurlijk weer un snipper op en dan hef hee de kop d’r niet bie.”
Zee ging weer terugge noa de keuken en zei tegen Berend: “A’j dat beest wilt slachen mo’j wel un troefel gebruuken.” Heur man wist niet hoe hee ut had. Wat bedoelen zee noe toch? Zee zei: “Ik bedoel dat ze oe mooi te pakken heb ehad doar in ut café. De jongens heb d’r stenen in de deuze edaon inplaatse van de kniene. Ie bint oe geld mooi kwiet. Eigen schuld mo’j maar niet handelen in ut cafe doar ku’j zoiets verwachen.”
Berend oavertuugen zichzelf en ging kieken. Hee mos zien vrouw geliek geven d’r zaten un paar beste stenen in de deuze. Ze hadden um un goeie zet eleverd. Maar hee zol de jongens wel weer kriegen. Zien tied kwam nog wel.
Un dag of wat later was hee d’r weer en proaten d’r nauwelijks oaver. De jongens vonden ut sportief dat hee d’r niet lilluk um was en gaven um gewoon ut geld weer terugge. Ut was hun niet um ut geld te doen maar gewoon um ut geintje. Ze hadden d’r allemoal veul schik um ehad en Berend kon ut wel waarderen. Hee zol ut zelf ok edaon hebben.
Goed goan,
Martien,
de Platschriever uut Loenen
Die bie alles ut beste is, is ut slechtste veur zichzelf
