Foi, foi: Krekel

Kleine beestjes, insecten, heurt niet in huus. Ie kunt d’r bar last van hebben. In de zommer kunt de muggen ut un mens bar lastig maken. Wat ku’j alderbastend hellig worden as d’r ’s nachts oe un mugge um de kop zit te soezen.
Toch kan un ander klein beesien knap lastig wèzen in ut huus. Mo’j is heuren wat ik vernommen heb oaver un familie die eploag worden deur un krekel… Iele kent zo’n ding wel: ut is krek un kleine sprinkhane. Ze nuump ut ok wel ‘un hiempien’.
Un echtpaar kwam in disse regio op visite. Ut geprek kwam al rap op de krekel. Zee vertellen un mooi verhaal. De vrouw zei dat ze hoast niet meer in ut huus kon wèzen. In de kamer zat un krekel en dat ding schrèèuwen de hele dag maar deur. Woar in huus zee ok was ze heuren ut oaveral. Ze kon d’r niet meer tegen. De man en vrouw hadden al van alles geprobeerd maar niks hielp. Ze zei ok nog dat ut zetten van un muuzenval niks hielp omdat de krekel doar toch niet noar toe ging. Zee wist toch niet wat ze d’r mee an mos.
Noa un hötjen kwam de zoon thuus. Hee woont varre weg anders hadden ze zien hulp al wel eerder in eroepen. Zien moeder was arg blie met zien komst want die wist meestal oaveral wel road op. “Kom d’r is effen bie”, zei ze, “wiele heb de laatst tied bar last van un krekel. Ut geluud kump doar van ut plafond af. Doar mot dat rotding argens zitten. Klim d’r maar is effen bie en vang dat ding veur ons.”
De zoon wol dat natuurlijk wel. Hee zei: “Loat wie dat euvel direct maar effen oplossen. Dat ding kan niet zovarre weg wezen. Ik krieg um wel te pakken. Ik pak de trappe effen en zal doar wel is effen snuffelen bie de lampe of reukmelder. Ut liek mien dat ut doar vanaf kump.” Hee halen de trappe uut ut schuurtje en doarmee noa de kamer toe. Toafel an de kante. Eerst bie de lampe ekeken maar doar kwam ut geluud niet vandan. Dan maar de reukmelder van ut plafond slopen. Met gereedschap dreeien hee de reukmelder d’r af. Hee zei: “Ik geleuve dat ik um heb, want ik heur um nog steeds. Ik goa d’r wel effen mee noa buuten toe. Buuten schrèèuwen ut ding maar deur. Zien moeder zei nog: “Doe rap de deure dichte anders kump hee d’r weer in. Noe is hee mooi buuten.”
De zoon bekeek dat ding is goed en begon hardop te lachen. Zien vader zei: “Wat he’j noe toch te lachen. Wiele bint al blie da’j ut rotbeest te pakken heb. De hele dag ko’j um heuren”. De zoon zei nuchter: “Och is ut helemoal gien krekel maar de batterij is bienoa lèèg en dan gif dat ding zo’n geluud. Geef maar effen un nieuwe batterij dan is ut oaver.!!” De batterij kwam rap te veurschien. De nieuwe batterij d’r in ezet en de rust was weer ekeerd. Ze konden noe rustig sloapen….

Goed goan,
Martien, de Platschriever uut Loenen

“Wa’j bint is belangrieker dan wa’j hebt”

LAAT EEN REACTIE ACHTER

Vul alstublieft uw commentaar in!
Vul hier uw naam in

Deze site gebruikt Akismet om spam te verminderen. Bekijk hoe je reactie-gegevens worden verwerkt.