Foi, Foi: Pocher

0244226_Foi_Foi.jpg
.

Keerls die bekend stoat as grote pochers wördt nog wel is te pakken enommen. Sommigen kunt d’r wat van um van zich af te bloazen. Luu die met zo’n keerl wark kreeg d’r soms schoon genog van. Ja, en dan ku’j verwachen dat ie op un dag de streken thuus krieg.
Hans was ok zo’n keerl. Hee kon alles bèter. Hee warken op un fabriek in ut laboratorium woar van alles wörden etest. Zo geet dat op veul fabrieken. Alles mot bekeken wörden.
De man warken ok wel met amoniak. De meeste lezers kent dat wel. Naar spul, dat ku’j maar beter niet oe gezichte kriegen, want dat is niet zo best. Maar ja d’r mot soms mee ewark wörden. In die fabriek ok. In de schaft zeien sommigen dat ut zulk naar spul was. Niet fijn dat ze dat door gebruuken. Maar ut was neudig. Ze hadden d’r allemoal last van, behalve Hans. Hee zei dat ut flauwekul was. Ut viel allemoal best mee. Dit zei hee geregeld en zien collega’s waren dat gepoch helemoal zat en dachen d’r oaver um Hans dat is af te leren. Maar ja hoe ku’j dat noe ut beste doen? Wel effen oaver prakkezeren natuurlijk. Opens kwam een van de keerls op un idee. Ze zollen um wel effen te pakken kriegen met ammoniak. Hee zei dat hee d’r gien last van kreeg. Nou dat zollen ze wel is zien.
D’r wörden ut een en ander af esproaken. Ze wisten dat Hans meestal op dezelfde tied noa nummer 100, de wc, ging. Dat was wel gemakkelijk um hun plan uut te voeren. Ze spraken af um samen op dezelfde tied in de buurte van de wc’s te kommen. D’r wörden goed op elet welke deur hee in ging. Verduld, doar kwam Hans an, krek op tied. De collega’s waren in de buurte, maar lieten zich niet zien. Ut mos un verrassing wèzen.
De jongens zagen dat hun plan krek ging zoals ze dachten dat ut mos goan. De collega’s wachen eerst effen tot Hans rustig op de pot zat en deed wat hee mos doen. Un collega pakken toen un stok met een lappe d’r an en stoppen dit in un flesse met ammoniak. Foi,foi wat un stank kwam d’r af. Niet mooi meer. Maar wat deed de man met de stinkstok? Hee stak die onder de wc-deure en doar was ut meteen un stank van jewelste. Meteen heuren ze Hans schreeuwen en proesten, niet mooi meer. Foi, wat ging hee te keer. Hee gooien meteen de deure lös en met de bokse nog onder an de bene liep hee weg. Met de blote konte roazen hee in ut ronde. Foi, foi wat was die keerl toch alderbastend hellig. Zien collega’s stonden op un afstand te kieken en lachen zich un bult.
De afloop löt zich roaden. Hans hef un rustige plek ezoch um zich weer an te kleden. Ja, eigenlijk mos hee de köttel wel kwiet, maar hee had de schrik goed in de bene.
Wieselijk hef Hans d’r later weinig oaver ezeg wat ze met um uut hadden ehaald. Maar noa die tied, was hee heel wat rustiger en zeker gien gepoch. Maar vake heb ‘de jongens’ doar nog met veul schik oaver eproat.

Goed goan,
Martien,
de Platschriever uut Loenen

Wanneer ie twiefelt, vertel dan de woarheid

LAAT EEN REACTIE ACHTER

Vul alstublieft uw commentaar in!
Vul hier uw naam in

Deze site gebruikt Akismet om spam te verminderen. Bekijk hoe je reactie-gegevens worden verwerkt.