Foi, Foi: Buukgriep

0235221_Foi_Foi.jpg
.

Foi, Foi: Buukgriep

De vrouw van Jan had un bitjen moeilijkheden met wat ze nuump ‘de stoelgang’. Dat is un deftig woord veur hardlievigheid. (Plat gezegd: zee kon de köttel niet kwiet wörden). Zee ging noa de dokter en die had d’r wel un middeltje veur. Elke dag mos zee un paar tabletjes innemmen. As zee dat mar deed, was d’r niks aan de hand.
Jan en zien vrouw gingen un dagje uut. Zee vroeg an Jan: “Wil ie niet un paar van die dingen bewaren. Ik kan ze dan goed op tied innemmen en hoef niet extra un tasse mee te nemmen.” Natuurlijk wol Jan dat. Toen ze noa un mooie fietsdag thuus kwamen, ging de jas uut en Jan dach niet meer aan de tabletjes die waren oaver ebleven.
Un wèke later mos Jan d’r weer op uut. Rap de jas an en hee vuulen wat in de zak. Wat was dat noe? Ut leek wel lekkere snuupies. Hee hef d’r un paar op esabbeld. Ze smaken best.
Un paar uur later kreeg hee toch un krampen in de buuk (of boek). Hee wist niet hoe hee ut had. Ut leek wel buukgriep. Ut wark op de boerderië mos gewoon deurgoan. Onder ut melken mos hee elke keer de stal uut en rap noa de plee. Later noa ut land, de suukerwortels mossen d’r ok uut. De krampen gingen maar deur. Arg ziek was hee d’r niet van, maar hee mos zo vake. Op ut land he’j gien plee, dus elke keer maar de struuken in. Ja, wat mos hee doen? Hee had wel wat kranten mee enommen maar die waren zo op. Hee mos ut noe elke keer maar doen met un votse gres. Niet zo lekker natuurlijk, maar Jan zeg altied: “Ie mot oe redden in de tied da’j lèèf.” En zo is ut maar net. Foi, foi wat had Jan ut slech. Hee had nooit gien buukgriep en noe inens die krampen. Hee kon ok niet bedenken dat hee wat verkeerds had egèten. Misschien kolde. ’s Oavonds zat hee onder de koe, de scheiterië wörden al hee wat minder, maar oaver was ut nog lang niet. Hee bedach inens dat hee die snuupies die hee in zien jas had evonden die margen had op egèten. Wat waren dat ok al weer veur dingen? Inens ging um un lichien op, verduld dat waren de tabletjes van zien vrouw. Die waren veur de hardlievigheid. Die rotdingen hadden bie um de darmen kats van streek ebrach. Dat hee doar niet eerder an had edach. Wat stom van un um die dingen die hee niet kennen maar zo op te èten. Later vertellen hee ut nog tegen zien vrouw hoe de vörke an de stelle zat. Die mos d’r bar umme lachen en gaf um wat om de buukloop tegen te goan. “Zo geet ut”, zeg zee, ”A’j niet goed noadenk dan kan oe zoiets gebeuren. Ze help mien goed, maar ja, ik bin un hardbars en heb zoiets wel neudig want anders geet ut niet goed. Ie heb bliekbaar un zachte buuk die dat niet nodig heb. Maar affijn ie weet ut noe veur de volgende keer: a’j ut niet weet, niet èten.”

Goed goan,
Martien,
De Platschriever uut Loenen

Heb begrip veur oezelf en doarmee ok veur un ander

LAAT EEN REACTIE ACHTER

Vul alstublieft uw commentaar in!
Vul hier uw naam in

Deze site gebruikt Akismet om spam te verminderen. Bekijk hoe je reactie-gegevens worden verwerkt.