Foi, foi: Eigen rechter

0233378_Foi_Foi.jpg
.

Foi, foi: Eigen rechter

Boer Wolter, un beste gemoedelijke keerl, had gluuiend de pest in. Hee had ut bult holt bie de stal onder de looze (schuur) op estapeld. Elke keer zag hee dat d’r weer un klamp (deel) holt weg was ehaald. Verduld, doar mos hee wat an doen. Angeven bie de politie doar zag hee niks in. Al die trammelant en dan mos hee nog kunnen bewiezen wat d’r was wegehaald.
Wolter wol d’r wat op vinden… Hee an de slag met un droadjen met wat blikken d’r an. Ok niks weerd. Wolter was ut meer dan zat, want ut jatten van ut holt ging maar deur. Geregeld missen hee holt. Hee had wel un vermoeden die ut ewes kon wèzen, maar ja ie mot met bewiezen kommen of betrappen. Op heterdoad.
Noe za’k um wel kriegen, zei Wolter tegen Dora, zien vrouw. “Ze haalt mien alle holt weg. Ik heb d’r rot veur ewark en un ander stoak ut op. Ik weet d’r wel iets anders op, dat mot noe maar gebeuren.” Wolter ging an ut wark. Hee pakken un paar blokken holt, maken d’r un gat in en stoppen doar flink wat jachpatronen in. Toen weer netjes dich emaak. A’j ut niet wisten, zag ie d’r niks meer van. Hee de blokken netjes veuran eleg, woar de dief ze wel mos griepen. “Noe heur ik vanzelf woar ut geet gebeuren”, zei de boer tegen zien vrouw, “wiele wach gewoon af.”
Ut duren un tiedjen en intussen had hee zien streek wel rond verteld deur ut darp. Hee wachen en wachen, maar gien reactie. Doar snappen hee gien donder van. Degenen die ut holt had estoalen, mos noe onderhand ut holt op ut vuur hebben egooid en dat mot un reactie hebben egeven of die mos zo’n grote veurroad hebben.
Noa twee wèken keek hee wel arg raar op toen de politie bie um aan de deure kwam. De politie in ut darp had vernommen dat d’r bie un gezin un ontploffing had veur edoan in de kachel en dat d’r nogal schade was ewes. In ut darp hadden ze ok vernommen dat Wolter de dader kon wèzen, umdat ut al zovake was deurverteld. De schade was nogal mee evallen, maar de agenten wollen um toch stevig vertellen dat wat hee edoan had wat eigenlijk niet moch. Ze snappen wel dat Wolter gluuiend hellig was, maar hee had dat toch niet meugen doen.
Toch kreeg gien bekeuring, maar alleen wat moppers. De man die ut holt had ejat durven gien angifte te doen, want dan kwam ut uut dat hee de dader was. De politie zei um nog: “Ie heb geluk ehad. D’r bint gien dooien evallen, maar ut had heel anders kunnen aflopen. D’r is gien angifte edoan dus wiele kunt officieel niks doen, maar denk d’r de volgende keer wel an; gien eigen rechter speulen.”
Wolter beloaven dat natuurlijk, maar had d’r wel bar schik van dat zien list prima eluk was. Die keerl kwam nooit meer holt jatten bie um, dat was zeker en ok gien ander, want heel ut darp wist d’r van.

Goed goan,
Martien,
de Platschriever uut Loenen

Un handvol geduld is meer weerd an un barg harsens

LAAT EEN REACTIE ACHTER

Vul alstublieft uw commentaar in!
Vul hier uw naam in

Deze site gebruikt Akismet om spam te verminderen. Bekijk hoe je reactie-gegevens worden verwerkt.