Home / Algemeen / Foi,Foi: Zuunig

Foi,Foi: Zuunig

Ut is bekend dat de grote boeren vrogger aldersbastend zuunig waren. Ut volgende verhaal hef zich achter Zutphen af espeuld bie een van de grote boeren. Gait vertellen mien doar ut een en ander oaver. Zien grootvader Willem had dat mee emaak. Hee warken bie un grote kleiboer. Hee kwam doar toen hee ruim dartig joar was. Hard warken van de vrogge margen tot de late oavond. Samen met de andere knechten en de meiden mos d’r un bult wark verzet worden. Heuien, eerpels rooien, graan meeien en nog veul en veul meer. D’r waren gien machines, alles met de hand. Hee was bar mager en krom egruuid van ut warken an de grond. Hee verdienen maar un paar cent. Tachtig cent per dag. Nog gien dubbeltjen per uur. De boer menen nog wel dat hee zien personeel goed betalen. Doar ging hee groots op. Zelf deed hee gien bliksum. Oaveral stond hee te loeren met un grote sigare an en meestal ging ut niet hard genog. Grootvader Willem maken zich doar niet druk umme. Hee warken zo zien eigen tempo. De boer kon nog zo drammen, hee warken gewoon deur. De anderen hadden doar wel is schik van, want die waren arg bange veur de boer.
Willem was al un beste tied bie die boer. Ut was un slechte tied met weinig banen en och a’j oe niet veul antrokken van ut rachelen van de boer ko’j d’r wel wèzen. Oaver un paar dagen zol hee veertig joar in dienst wèzen bie de boer. Willem dacht minstens un kistjen sigaren te kriegen. Hee wörden op die bewuste dag in de keuken eroepen bie de boer. Willem kreeg goeie koffie en ok nog un sigare.Verduld dat had hee nog maar weinig ehad van zien baas. Noa wat geproat zei de boer achter de sigarenrook: “Willem ie bint hier noe al veertig jaor in dienst. De laatste joaren he’j tachtig cent per dag verdiend. Tja, de tieden wördt slechter. Personeel is ok duur. Ie wordt ok older en older en ut geet allemaol niet zo hard meer. Ik wil oe niet wegsturen. Ie mag hier nog wel un paar joar blieven, maar dan geet d’r wel un dubbeltje per dag af. A’j wilt blieven dan kreeg ie zeuventig cent per dag. Ik dache dat dat niet slecht is veur un man van zeuventig joar. En ie kreeg d’r ok nog eerpels bie veur de winterdag!”
Ut veurstel oaverviel Willem wel un bitjen. Op de dag dat hee veertig joar in dienst was kreeg hee gien extraatje veur zo’n lang trouwe dienst, maar verduld loonsverlaging umdat hee wat older wörden. Hee krabben zich is onder de pette. De boer verwachten eigelijk dat Willem zol vertrekken maar ut pakken heel anders uut. Ut ging krek zoals de andere knechten verwachen. Willem kon ut altied zo treffend zeggen. Noe ok weer. Hee trok un paar keer goed an de sigare en bloazen in de richting van de boer en zei heel rustig: “Boer ik goa niet vot. Ik blieve hier. Ik mag dan misschien gien twintig meer wèzen, maar ie heb veertig joar mien vleis ehad, de laatste joaren mag ie ok nog de botten afkluuven.” Wat de boer toen hef ezeg is niet bekend.

Goed goan,
Martien,
de Platschriever uut Loenen

Ie mot poppen noa da’j lappen heb

Lees ook

Veluwonen legt op duizendste huis zonnepanelen

EERBEEK – Patricia uit Eerbeek was de duizendste huurder van woningcorporatie Veluwonen die zonnepanelen kreeg. …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.