Home / Alle-Regiobode / Foi,foi: Sinterkloas

Foi,foi: Sinterkloas

Sinterkloas en zien gevolg hef altied iets aparts. Leuk veur de kinder. Tenminste zolang ze klein bint. As ze wat groter wördt kump un tied dat ze de woarheid mot (of wilt) weten. En ja, hoe geet dat dan? Hoe vertel ik ut mien zoon en dochter heel veurzichtig dat Sinterkloas eigenlijk un sprookjen is? Sommige kinder kunt ut hoas niet begriepen, want ze vonden ut altied zo spannend. Veurige wèke heuren ik van iemand dat hee vrogger gloepend hellig is ewes toen zien moeder um vertellen dat Sinterkloas eigenlijk niet bestond. Dagenlang is hee d’r bar hellig oaver ewes. Later trok hee wel bie toen hee mooie kadootjes kreeg, want doar ging ut toch umme. Ut blif veur ut kinderspul un mooie tied. Wel anders as vrogger, toen ie bie de schoorsteen un schoen of klomp moch zetten. Doarbie natuurlijk un wortel en heui veur ut peerd, want die had dat wel verdiend met ut klabateren over de daken hen. Maar ja, schoorstenen bint d’r noe bienoa niet meer. Ut is mien un roadsel hoe de Sint of zien knechten binnen komp um de kadootjes af te leveren. Toch krig hee dat allemoal veur mekaar. Ze vertellen mien dat zien personeel un heel grote bos met sleutels hef en oaveral in kunt kommen. Ze doet dat goed in stilte.
Dit joar wordt d’r denk ik anders Sinterkloas evierd. Dat kump natuurlijk deur die nare coronavirus. Sinterklos kump niet meer an met veul volk en mag dit joar heel veul niet. Maar d’r bint in veul gezinnen toch nog wel de tradities um surprises veur mekaar te maken. Leuke geintjes woar heel wat luu druk mee bint. Vake met lootjes trekken en dan veur mekare wat bedenken. Veur sommigen is dit un hele opgave, want vake weet ie niet wat te bedenken of te maken. Zo was d’r un paar joar elejen in disse streek ok un leuk geintjen. De vrouw kan d’r noe nog bar umme lachen, want ut mot toch un raar zicht ewest wèzen hoe die vrouw d’r bie stond toen zee wat pruuven noa un flinke hap.
De familie had met mekare af esproaken dat ze allemoal wat zollen doen. As ut kon graag un surprise met gedicht, dat gaf altied veul schik met mekare. En d’r mot ok altijd wat lekkers bie kommen. Ze wisten dat een van de vrouwen bar gek was op un banketletter. Och ja en dat is niet zo moeilijk um te kopen maar wel um d’r iets leuks mee te doen. Toch is zee lillik te passe ekommen, want wat hef d’r ene edoan? Zee hef netjes de letter uut ut deusien ehaald en inplaats van de spijs hier gruune zepe in edoan. Niks meer van te zien en ut deusien weer netjes dicht edoan. En toen gebeuren ut. Natuurlijk moest deur Toos de lekkere banketlekker epruuf wörden.
Ze pakken de letter uut ut deuzien. Ut zag d’r heerlijk uut. Ze nam un flinke hap en toen ha’j ut gezichte motten zien van Toos. Ut smaken natuurlijk bar vies. Foi, wat proesten zee toch. En iedereen lachen natuurlijk. Ze heb doar joarenlang nog veul plezier umme ehad.

Goed goan,
Martien,
de Platschriever uut Loenen

Begin en de helfte is kloar. Begin opnieuw en alles is af

Lees ook

Rick Evers: De loper

Vroeger zag ik altijd een man die liep. En op zich is dat niet zo …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.