Home / Alle-Regiobode / Foi, foi: Belastingcontrole

Foi, foi: Belastingcontrole

Ambtenaren van de belasting kom ie oaveral tegen. A’j zelfstandige ondernemmer bint, dan komt ze van tied tot tied controleren of ie de zaak niet bedondert. Ze goat d’r al vanuut dat d’r wat te halen völt. Ok op ut boerenbedrief komp ze. Mo’j is heuren wat ik heb eheurd van boeren in darpen kört bie de Iessel.
Bie boer Willem kwamen ze ok geregeld in de boeken snuffelen. Meestal vonden ze wel iets dat volgens hun niet goed in orde was. Meestal flauwekul, maar ja un ambtenaar is un ambtenaar. Willem was un klein boertjen. De controleur kwam wel wat ongelegen, want de boer had nog heel wat andere dingen te doen die hartstikke neudig mos gebeuren. Maar dat vond de ambtenaar niet arg. Willem deed um uut de doeken dat hee bar druk was en d’r niet bie um kon zitten. “Geef mij de boekhouding maar, daar red ik me wel mee” zei de man. De belastingkeerl ging an toafel zitten en de boer zetten de schoenendeuze vol met papieren noast um neer. “Um twaalf uur bin ik d’r wel weer” zei Willem en ging vot. Toen hee um twaalf uur thuus kwam zat de ambtenaar nog steeds in de papieren te wruuten. Ut zweit liep um langs ut gezichte hen. “Hier kan ik niet uitkomen”, zei de man. “Nee ik ook niet”, zei de boer. “Ik kon er ok niks mee beginnen.”
Willem dach de man te pakken te hebben, maar kwam van de kolde kermis thuus. Wat later kreeg hee de blauwe brief in de busse en ut was un beste anslag, doar sloeg hee bienoa van ondersteboaven. Maar hee kon niet bewiezen dat ut niet goed was. Hee had immers de pruttel niet goed op orde.

Bie boer Gaart kwam ok un controleur. Ok doar wörden alles van A tot Z noa ekeken of d’r nog wat extra te halen viel veur de belasting. En ja heur, de man vond wat. Hee vond ut raar dat d’r veul kippenvoer was ekoch en weinig eier verkocht. “U betrok kippenvoer van de molenaar voor een flink aantal kippen dat zag ik door de rekeningen, maar u leverde weinig eieren af aan de eierhandelaar. Hoe komt dat?”, wol de man weten.
De boer zei: “Och de kippen waren lange tied in de ruu en dan leg ze gien eieren. Wist ie dat niet?” De ambtenaar snappen d’r niks van, vertrok maar d’r kwam wel un beste blauwe brief.
Ok bie boer Bart kwam de controleur op bezoek. Ok hier weer in de boekholding snuffelen en nog is loeren. Rekeningen noakieken en mar vargelieken of d’r nog iets scheef zat. Verduld doar had de belastingman wat ontdekt.
Ut viel de man op dat hee verschillende keren zag dat d’r geld was betaald an un stierenholder veur ut dekken van de pinken en koeien. “Dat is toch wel heel veel geld wat je daaraan hebt uitgegeven gezien het aantal koeien dat je bezit”, zei hee. Tja, dat kon de boer ok niet ontkennen maar wol ok niet zeggen dat hee eigenlijk meer pinken had dan hee op egeven had. Maar hee had zien antwoord zoals altied al kloar. Hee vroeg an de belastingcontroleur: “Bin ie ok etrouwd?” De man zei: “Jazeker, maar waarom vraagt u dat?” Bart zei met un kwinkslag: “Dan zal meneer ok wel weten dat niet ieder schot raak is!”

Goed goan,
Martien,
de Platschriever uut Loenen

Hoe varre ie ok bint op de verkeerde weg, keer umme

Lees ook

Collectanten MS Fonds gezocht

REGIO – Van 16 tot en met 21 november vindt de landelijke huis-aan-huis collecte van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.