Home / Alle-Regiobode / Foi, foi: Mooie drankjes

Foi, foi: Mooie drankjes

Laats was ik met Sien an de proat. Zee vertellen un leuk verhaal oaver drankjes. Daor mo’j goed mee uutkieken. Mo’j is heuren. Zee ging an de proat: “Gelukkig bint mien man en ik nog goed gezond. Als ut weer un bitjen goed is goa wule d’r met de fietse op uut. Wule blief dan gezellig in eigen umgeving. Toen ut veurige wèke mooi weer begon te wörden was bedach ik dat ik eerst nog wat booschappen mos halen Ik pakken in de supermarkt van alles en bie de drankafdeling zag ik van die flesjes met mooie kleurtjes. Ze waren niet zo goedkoop, maar ik dache: loat wie is un keer gek doen en ik deed d’r vier in ut karretje.
Un paar dagen later was ut mooi weer. ’s Middags d’r met de fietse op uut. De thermoskanne met koffie ging mee en die mooie flesjes en appels. Noa un half uurtje fietsen dronken wule de koffie op bie un picknickplaatse en noa un kwartiertjen weer op ut stalen ros en varder in het rond. Noa drie kwartier fietsen zei mien man dat hee zo’n dorst had. Op de eerste banke die wule tegenkwamen bin wie goan zitten. Noe was ut de beurte an de mooie flesjes. Ut was arg lekker en ik had ut idee dat ut mien wat noa de kop steeg en Willem begon inens wat raar te doen. Hee streek maar zo deur mien hoar. Dat had hee joaren niet edoan. Ik zei niks, maar zo’n gebaar dut oe op de olde dag wel goed.
Wule besloaten varder te goan, maar ut fietsen ging minder best. Noa un kwartier zei Willem dan ok: “Sien heb ie nog zo’n lekker drankje bie oe. Ik vond ut bar lekker.” Eerst wol ik ut niet maar Willem drong zo an en beien heb wule d’r nog ene op emaak. Heerlijk was dat. Ut was ok an Willem te marken. Hee wörden d’r jong van en kroap zo dich tegen mien an op de banke. Ik kreeg ok zo’n warm gevuul oaver mien hen. Ut was heel raar. Mien benen worden arg zwoar en Willem begon van alles te lollen. Ik dach al zol d’r wat in die drank hebben ezèten. Ik vertrouwen ut niks. Willem wol niet noar huus, hee vertellen van die starke verhalen. Maar ja, wule mossen toch op huus an. Eindelijk op de fietse. Gelukkig was ut niet varre meer. Willem zwaaien onderweg noar iedereen. Ik schamen mien rot. Ut leek wel un dronken keerl. Hee zong ok hard oaver stroate hen ovar de Klokken van Arnemuiden en ok nog wat minder nette liedjes.
Toen wule thuus waren dach ik: “Noe mot ik toch is goed noa ut etiket kieken. Noe had ik de brille wel bie mien. Op ut etiket stond Breezer. En toen las ik dat in disse frisdrank vijf procent alcohol zit. Toen ik dat elezen had wist ik ok meteen woar al die gekkigheid van Willem vandan kwam. Hee had un snipper in ut oor deur die alcohol. Ik heb d’r varder niks tegen Willem oaver ezeg maar de volgende keer nem ik d’r twee mee en gien vier of meer anders löp ut kats uut de hand.”

Goed goan,
Martien, de Platschriever uut Loenen

Vlijt en wiesheid gif veurspoed maar lui wèzen en dommigheid armoede

Lees ook

Business & Shopping: Coronaproof verwarmingsmaand bij Installatiebedrijf Smeijer

DIEREN – Zoals al jaren in deze periode houdt Installatiebedrijf Smeijer in Dieren ook dit …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.