Home / Alle-Regiobode / Klein Amsterdam

Klein Amsterdam

In Voorst trof ik iemand die heel wat weet van ut kleine darpien Klein Amsterdam. Ze nuump dat ok wel in buurtschap. Veur degenen die niet weet woar ut lig kan ik ut effen uutleggen: a’j van richting Loenen komp oaver de Achterste Mölle en dan mo’j bie De Viersprong richting Voorst anhollen. Niet te hard riejen anders bi’j d’r deurhen. A’j van Zutphen komp. dan ku’j bie de Meeuwenbarg deur Empe riejen en dan kom ie vanzelf in Klein Amsterdam. Vanuut ut darp Voorst linksaf richting Klarenbeek en Loenen dan zie’j de borden wel stoan.
De luu doar bint nogal op zichzelf, maar wel goed volk dat samen veul op touw zet. Ze heb ok un eigen burgemeester die wel gien officiële taken hef, maar wel de titel. Soms zit hee wel met de Voorster burgemeester Jos Penninx samen an de toafel, want as d’r un borreltje wördt eschonken kump hee graag uut Twelle noa de buurtschap. De burgemeester van Klein Amsterdam kump goed op veur de belangen van de buurte. Ze doet heel veul samen. D’r is ieder joar un fietstocht en ze goat ok nog vogelschieten. Ieder joar un nieuwe koning. Ut is nog un hechte gemeenschap. D’r komp ok nieuwe inwoners. Luu uut ut westen, ze nuump dat import, doet heel goed mee met alles wat d’r in de buurte gebeurd. D’r bint op ut platteland heel veul tradities en die mo’j in ere hollen.

Ze heb doar sinds kort ok un eigen feestzaal. An de varkens was veur Jaap gien donder meer te verdienen en deurumme ging hee noe de horeca in. De varkensstal is noe un mooie feestzaal ewörden. Heel netjes hef hee dat edoan. Ut kosten wel heel veul moeite want dat mag zo maar niet. Alle feesten van de buurtvereniging en zittingen van B en W wördt doar ehollen. Jaap mos doar ok nog papieren veur halen en alles mos volgens de veiligheidseisen gebeuren maar ut is um allemoal eluk. Heel vake bint d’r noe feesten van luu die de veurjoardag goat vieren of un ander feestje.
Menigeen vrög zich af hoe ze noe in vredesnaam komp aan de naam Klein Amsterdam. Ut is d’r toch un alderbastend varre van dat grote Amsterdam. D’r is un uutleg oaver dat ut geet um un nederzetting van mensen die vanuut Amsterdam hier neer estreken bint. Ok wel andere verhalen. Allemoal gedram: eindelijk noa vieftig joar kwam ik achter de woarheid. En ja die kan hard wèzen. De man die ut kan weten vertellen mien dat de naam heel anders is ontstoan.
Mo’j is heuren… In die buurte woont aardige luu maar vrogger schient ze d’r nog veul leuker te wèzen. Veural vrouwluu die niet zo eenkennig waren. Van lichte zeden dus, um ut netjes te zeggen. Iemand mot toen ezeg hebben: “Foi wat woont hier toch veul van dat soort vrouwen, ut liek hier wel Klein Amsterdam”. Noa die tied heet de buurte gewoon Klein Amsterdam. Wel un mooie naam. Nog un geluk dat die man niet ezeg hef: “Ut liek hier wel De Kleine Walletjes!”. Klein Amsterdam klink toch heel wat bèter. Maar goed wiele weet ut noe en zand d’r oaver!

Goed goan,
Martien, de Platschriever uut Loenen

Ok al bin ie un mens, dat wil niet zeggen da’j ok menselijk bint

Lees ook

Ansichtkaarten van Stichting IJsselhoeven

REGIO – Op verzoek van Stichting IJsselhoeven is een vijftiental fotografen de afgelopen periode op …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.