Home / Alle-Regiobode / Foi,foi: Prutsen met uurwark…

Foi,foi: Prutsen met uurwark…

Alles wa’j kwiet mossen ging vrogger noar de stoartplaatse. Doar kwam natuurlijk van alles terechte. De jongens gingen d’r vake op uut um argens in de buurte wat op te scharrelen. Soms ku’j d’r wat leuks met doen. Hendrik Weenink hef dat ok met emaak en vertelt in de Moespot hoe dat vrogger ging.
Met zien breurtje Wim ging Hendrik op un dag noa de stortplaatse in ut darp. Ze gingen doar geregeld hen want d’r was altied wel spullen wat hun passen. Hier en doar wat krabben en schuiven in de rommel en ja heur doar vond Hendrik un old uurwark van un grote klokke. Ut ding zag d’r niet best meer uut maar Hendrik wol um toch mee noa huus nemmen. Thuus in de looze, achter de boerderie, wol hee toch is proberen of hee ut ding, met radertjes, wieltjes en pinnetjes, aan ut lopen kon kriegen. Ze bekeken dat samen van alle kanten. Hendrik proberen d’r nog wat beweging in te kriegen. Maar niks heur ut zat muurvaste. Hee stak zien wiesvinger d’r tussen. Dat lukken nog wel maar verduld, hee kon de vinger d’r niet meer uut kriegen. Hee zat d’r muur en muurvaste tussen in. Ut begon Hendrik al gloepens zeer te doen en ut jong begon al flink te blèren. Ut leek wel un mager varken. Moeder was in de keuken en heuren buuten ut gebleer van Hendrik. Ok zien vader kwam d’r bie kieken. Hoe vader ok proberen, hee kon d’r gien beweging in kriegen. Ok de buurman kwam op ut lawaai af. Die dach dat doar heel wat slims ging gebeuren. Hee marken (komisch) op dat Hendrik d’r nog wel negen vingers an oaver hiel.
Hendrik bleef maar blèren en tekeer goan. Va en Moe hadden wel medeliejen met ut jonk. Zien breurtjen stond d’r un bitje wezenloos bie te kieken. Wat noe te doen? Vader stellen veur um maar effen noa de dokter te goan. Die zol d’r wel un oplossing veur weten. Dokters weet en kunt van alles. Hendrik achter op de fietse van vader noa de dokter. De wachtkamer zat vol maar iedereen had medeliejen met de jongen die nog steeds brullen en brullen. De dokter nam Hendrik en zien vader direct mee noa binnen en bekeek de ramp is heel secuur. Hee mopperen nog wel un bitjen dat ut jong doar zo mee had zitten prutsen. Hee ging d’r mee gangs maar zien gereedschap was niet geschikt veur ut grote uurwark. Hee kwam d’r niet mee varder. Hee zei tegen Hendrik en zien va dat ze varderop noar de smid mossen goan. D’r mos wat groot gereedschap an te passe kommen.
De smid keek d’r ok van op en snappen niet hoe dat zo kon gebeuren. Hendrik reren nog hevig deur. De smid zag wel kans um Hendrik van zien uurwark te verlossen. Hee deed ut uuwark met vinger en hand in de bankschroeve. Huuverig keek Hendrink wat d’r allemoal ging gebeuren. Toen de klokke d’r vast tussen zat kon de smid met un tange ut uurwark uut mekare trekken. En ja heur. Eindelijk was de vinger vrie. Wat was Hendrik blie. Hee schrèèuwen ut uut van bliedschap. De vinger was blauw maar dat vond Hendrik niet arg, want um oe hele leven met un uurwark rond te lopen vond hee ok te ge,….

Goed goan,
Martien,
De Platschriever uut Loenen

Grote woorden gif nog gien grote daden

Lees ook

Carnaval in de regio

REGIO – Het zit er op, carnaval 2020 is voorbij. Hoewel er in de diverse …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.