Home / Alle-Regiobode / Foi, Foi: Worst in de boerenkool…

Foi, Foi: Worst in de boerenkool…

Tegenwoordig komt d’r veul luu uut de stad in ut buutengebied van ut platteland wonen. Ze vindt de ruumte zo fijn en alles is d’r rustig. En ze kunt noe zo lekker eigen gruunte kweken in eigen tuin, want dat is natuurlijk veul lekkerder als uut de supermarkt. Maar ze kiek d’r wel te gemakkelijk tegen an. Want a’j un lekkere kroppe sla of beuntjes uut eigen tuin wilt eten kump d’r heel wat kieken. Iemand kreeg sla van un tuinier, maar die zei later tegen de man dan zee liever gien sla had met zand en slakken d’r in. Ja, dat ku’j natuurlijk verwachten van sla zo van ut land. Doar zit zand en meestal ok wal slekkenI (slakken) in. Dat heurt d’r bie.
Um boerenkool(ze zek hier gewoon ‘moes’) te verbouwen is veul gemakkelijker die gruuit wel as (kool) a’j ze goeie grond geef. Toch lekker die eigen boerenkool. Ze zek dat ut eerst ‘de vorst d’r oaver’ ewest mot wèzen um un goeie smaak te kriegen.
Oaver de boerenkool geet ok ut volgend verhaaltjen dat ik un tiedjen elejen heuren vertellen. Ut kan maar zo gebeuren. Mo’j is heuren: In un darp niet zo verre bie mien uut de buurte was un jong echtpaar kommen wonen. Ze vonden ut arg fijn um buuten te wonen. Ze konden ut goed vinden met de buren. Ieder joar had de buurman van alles epoat en ezeeid in de tuin.
De nieuwe buurvrouw(uut de stad), die nog weinig ervaring had in ut tuinieren, had veul interesse in alles wat de buurman deed in de tuin. Gruunte uut eigen tuin vond ze arg lekker. Ze keek d’r bar van op dat de gruunte ut zo goed deed in de tuin. Toen ut al wat varder in de tied was gruuien de boerenkool bar mooi. De buurvrouw kwam kieken en vroeg an um weurumme hee die stokken bie de boerenkool had ezet. “Dat heurt d’r bie”, zei hee, “dat doe ik altied. An stokken dicht bie de planten goat de worsten gruuien. Dat heurt bie de boerenkool en komt d’r vanzelf an”.
Dat wol hee tenminste de buurvrouw wies maken. Dat plannetje had de man bedacht. De vrouw deed of zee alles geleuven en vond ut hardstikke mooi bedacht van de buurman. Maar…Ze zol um wel effen kriegen met zien proatjes. Zee ging ’s margens heel vrog uut berre en ging met un paar worsten noa de tuin van de buurman en knuppen die op an de stokken bie de boerenkool. Noe de reacties maar afwachten,
Later op de margen liep de buurman deur de tuin en wat hee toen zag… Hee kon zien ogen niet geleuven: worsten bie de boerenkool. Hee riep zien vrouw en zei: “Noe mo’j toch is kieken. Ik heb ut nog nooit ezeen: worst bie de boerenkool. Hoe kan ut zo gruuien op ut land”. De buurman had toen wel deur dat hee lilluk te pakken was enommen deur de buurvrouw. De worst hef um toch lekker esmaak…
Goed goan,

Martien, de Platschriever uut Loenen

‘Un mense telt wel zien geld maar niet zien joaren’

Lees ook

MS Fonds zoekt collectanten

REGIO – Van 16 tot en met 21 november houdt het Nationaal MS Fonds de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.