Home / Alle-Regiobode / Foi, Foi: Wie de schoen past

Foi, Foi: Wie de schoen past

D’r bint tegenwoordig heel wat luu die noa de rommelmarkt goat um wat pruttel te verkopen. Ze spoart van alles en nog wat op.
Mo’j is heuren want mien (uut betrouwbare bron) is verteld oaver iemand die ok zo’n handeltje hef en wel is noa rommelmarkten geet en doar mooi mee op de koffie is ekommen.
De man, ik nuum un maar Hans, was ok gek van un bitjen handel. Hee vond ut bar mooi um op de plaatselijke rommelmarkt te stoan met un kroame. Hee scharrelen van alles bie mekare um de kroame vol te kriegen. As hee argens wat zag en ut passen um dan ging ut mee noar huus toe en meestal had hee d’r wel un goeie neuze veur want Hans raken ut wel kwiet veur un mooi priesjen. Toch kan ut anders aflopen.
Hans was chauffeur bie un bedrijf. Hee mos met de spullen van zien baas ut hele land deur. Och en as hee dan argens kwam dan had Hans de ogen natuurlijk goed lös. Van alles had hee zo al op huus an esjouwd. Zien vrouw zei wel is tegen um: “Man hol toch op met al die pruttel. Straks zit wule met al die rotzooi. As ut slech weer is met die rommelmarkt verkoop ie d’r weinig van.” Zien vrouw kon zeggen wat zee wol Hans bleef maar verzamelen.
Op un dag had Hans un mooi buutenkansjen. Hee kwam bie un klante in Amsterdam. Hee mos wat wegbrengen en kwam zodoende ok bie de magazijnen van dat betreffende bedrijf. Hans bracht de spullen binnen en raken met die keerl an de proat. Ut ging oaveral oaver. Ok oaver de rommelmarkten die ok in Amsterdam wordt ehollen. Op Koninginnedag is Amsterdam één grote rommelmarkt. Veur luu as Hans mot dat un paradijs wèzen.
Ze raken varder an de proat en toen zei de Amsterdammer tegen Hans dat hee veur um nog wel un handel had stoan. Dat kon hee zo meenemmen. Ut was oaver ebleven van de laatste markt. Ut waren drie deuzen met kats nieuwe dames- en heren schoenen. Goeie degelijke schoenen. Hans bekeek zich dat is goed en dat leek um wel. Goeie schoenen, veural as ze nieuw bint, geet altied vot. Hee laden ut spul in en bedank de Amsterdammer uutbundig. Hee wreef zich in de handen: nou dat wat mooie handel. Kats veur niks, goedkoper kon ut niet.
Hans mos nog un paar adressen afhandelen en ging toen noa de baas en effen later noa huus toe. Thuus liet hee de handel zien. Zien vrouw leek ut eerst hartstikke mooi en snappen niet dat de mensen dat wegdeden. Maar toen ze d’r un paar mooien uutpakken um an te passen ging zee an ut zuuken en zuuken en ontdekken rap ut euvel: ut waren allemoal linkse schoenen!!!. Drie deuzen vol!! Noe ging Hans un lichien op. Verdikke noe had die keerl um toch te pakken ehad. Noe zat hee met die waardeloze pruttel. Ut sprèèk vanzelf dat Hans heel wat an mos heuren van zien vrouw en later ok van de familie en vrienden. Hans hef d’r goed van eleerd. Hee bekeek noe eerst secuur of ut wel un goeie handel is.

Goed goan,
Martien, de Platschriever uut Loenen

‘A’j mekare geliek geef bi’j zo uut eproat’

Lees ook

Rick Evers: Spareribs

Eens in de zoveel tijd gingen mijn vrouw en ik altijd onbeperkt spareribs eten bij …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.