Home / Alle-Regiobode / Foi, foi: Wildplassen

Foi, foi: Wildplassen

Mo’j is heuren wat ze mien vertellen oaver un wildplasser…
Derk had un goeie kennis. Die wol eerst gien hond hebben. Doar he’j un hoop wark mee en soms ok trammelant. En ok dat uutloaten is altied un bult wark. Bie weer en wind mo’j d’r uut. Hee had ut elke keer al uut esteld maar ja, op un moment was d’r gien hollen an, d’r mos un hond kommen. Wat veur soort(ras) de man an hef eschaf dat heb ik krek niet van Johan eheurd. Maar hee was d’r toch wel blie mee. Noe kreeg de man veul meer beweging. Noe mos hee d’r wel geregeld op uut goan. Die beweging deed um heel goed. En de hond wat ok bes un lief beest. Nee doar had hee niks te klagen oaver.
Maar ut kan soms raar goan. Op un dag was hee weer met de hond noa ut bos toe. Hee maken un beste ronde deur ut bos hen. De man had d’r niet op erekend dat hee zo’n grote ronde zol maken. Thuus was hee nog wel noa de WC ewes maar noe begon ut toch weer te dringen. De man bedach dat ut toch wel un bitjen te lange zol duren veurdat hee thuus was. Hee mos nog un flinke afstand lopen en dan met de auto nog un endjen. Al met al zol dat nog wel un klein uurtje duren. Nee, dat zol hee niet vol hollen want hee vuulen noe al zo’n druk op de bloaze. En dat zol alleen maar slimmer worden. Toen bedach de man dat ut bos groot genog was. Hee keek effen um zich hen en zag niemand ankommen. Ik zuuke wel un paar struuken um doar un plasjen te doen, dach hee, d’r is hier gruun en bomen zat. Ik binne wel un wildplasser en ut mag natuurlijk niet, maar dat maak hier toch ok niks uut. De harten en wilde varkens doet ut ok. De man liep iets van ut pad en deed doar tussen de struuken zien behoefte. Nou un plasjen, ut was un beste slomp. D’r kwam hoast gien ende an. Ut leek de waterval wel. Sjonge, sjonge, wat luchen dat toch op. Doar had hee gien last meer van. De man liep zien rondjen varder met de hond en zoch noa un tiedjen de auto weer op. Hee dach varder niet meer aan zien wandeling in ut bos. Maar wel de volgende dag. Verduld hee had un bitje jeuk en ut deed um um bitje zeer op op rare plekke. Dat marken hee ’s margens maar schonk d’r varder gien andacht an.
Toen hee ’s oavonds thuus kwam en noa ut eten noa de douche ging kwam hee d’r achter dat zien doad as wildplasser lilleke gevolgen had ehad. Hee bekeek zien ‘kleine jongen’ is goed en ja heur un teek had zich d’r in enesteld. Verduld doar was hee noe mooi kloar mee. Hee had wel vaker un teek ehad en wist hoe hee d’r mee umme mos goan. Vakkundig verwijderen hee ut rotbeesien. Veul hef d’r niet meer van evuuld. “Verduld’ zei hee nog tegen zien vrouw, “ut kwoad straf zichzelf. Ie kunt met goed fatsoen gien plasjen meer doen in ut bos doen….”

Goed goan,
Martien, de Platschriever uut Loenen

Ok nette luu vluuk wel, maar wat later

Lees ook

Business & Shopping: Afslanken met For Your Line

DIEREN – For Your Line is een studio waar mensen algeheel kunt afslanken door te …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.