Home / Alle-Regiobode / Foi, foi: Toekieken

Foi, foi: Toekieken

Mo’j is heuren wat ik noe weer van Willem heb vernommen. Die keerl hef vrogger toch van alles mee emaak. A’j an de proat bint dan komp de mooie verhalen vanzelf boaven. Ik zal ut effen uut de doeken doen wat um is oaverkommen.
Ut speulen zich af in november: de slachtmoand. Hee had un paar varkens vet emest. De meesten ging noa de slachterië en eentje gebruiken Willem en Toos veur eigen gebruuk. Ze hadden d’r noe ok weer un paar besten in ut hok liggen. Willem en Toos wollen best spek hebben en deurumme wörden ze merakels evoerd en lagen lekker in ut stro. Ja, de beesten hadden ut goed bie Willem. Maar ze waren vet en mosten eslacht wörden. De huusslachter kreeg bericht en un paar dagen later kwam hee zien wark doen. Ut was un merakels best varken.
Toen de slachter ut beest had afesneden zag Willem wel dat d’r beste hammen anzaten. Un deel van ut vleis ging in de pekel en de rest in de weckflessen. Toos hiel ok een stuk vleis apart veur de pastoor. Dat was in die tied zo ut gebruuk en zee wol niet achter blieven. Willem mos dat effen wegbrengen. Willem wol d’r metene hen goan, maar Toos zei um nog effen dat hee un schoon sporthemp aan mos doen, want hij kon toch niet zo smerig bie de pastoor aankommen.
Bie de pastorie bellen Willem an en de huusholster deed de deure lös. Toen Willem de bonke vleis wol geven zei zee: “Och Willem loop maar deur noa de éétkamer,de pastoor zit net te éten dan ku’j um dat zelf geven!” Toen Willem de eetkamer binnenkwam zag hee dat de pastoor lekker zat te smikkelen met un beste belle wien d’r bie. Tussen de happen deur vroeg de pastoor van alles. Willem vertellen dat hee best tevrèden was. Ut ging goed met de kinder. Ze waren gezond en konden goed meekommen op schole.
Ondertussen zat Wilem zich te verbieten omdat hee niks aan eboaden kreeg. Un borreltje was toch wel ut minste was hee um kon anbieden. Maar niks heur. De pastoor was blie met ut vleis en wol weten hoe ut ging met de beeste op de boerderie. Willem zei um dat ut merakels goed ging. De motte had vannacht krek un koppel van dartien keune ekregen dat was d’r één teveul want ut beest had maar twaalf titten. Doar kon Willem nog mooi druk mee worden. “Ja, ja”, zei de pastoor en hee deed zich nog un groot glas wien in: “maar hoe moet dat nu met dat dertiende big?. En noe zag Willem de kans schone um un raak antwoord te geven. Meestal was Willem niet zo’n vlotten maar dit keer had een zien woordjen kloar want hee was knap hellig in de botten. Hee zei tegen de pastoor: “Nou meneer pastoor”, hee wachten heel effentjes, “den dartienden hef ut toekieken! Net as ikke hier!”, zei hee d’r gauw achteran. De pastoor versloeken zich hoast in ut laatste stuksien vleis. Willem stond vlot op en maken rap dat hee wegkwam. Helaas hef de pastoor d’r niks van eleerd. Hee blif gewoon deursmikkelen.

Goed goan,
Martien, de Platschriever uut Loenen

Biej un ander op ut bord is ut altied vetter

Lees ook

Business & Shopping: Heerlijk Italiaans eten bij Pizza Limone op Landal Coldenhove

EERBEEK – Vrijdagavond 29 november opende op Landal Greenpark Coldenhove in Eerbeek het nieuwe Italiaanse …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.