Home / Alle-Regiobode / Foi,foi: Ut knientjen

Foi,foi: Ut knientjen

Op un dag waren keerls bie Hendrik in un darp bie de Iessel veur zien huus gangs. D’r ging un best stuk van zien tuin af, maar doar kreeg hee redelijk wat geld veur, dus doar had hee gien maleur oaver. Op un middag stond Hendrik zo te kieken en toen zag hee dat d’r un knientjen lös liep. Ut knientjen was wat uut de koers eraak deur dat gegraaf. Hendrik zag dat knientjen un lange rioolbuize invloag aan de kante van de weg. Hee zag ut ok wel goed dat de kniene d’r niet aan de andere kante uutkwam. Hendrik ging op de knieeën um te zien of ut knientjen d’r nog wel inzat. En ja heur middenin zat ut diertjen un bitjen bange te bibberen.
Zien oaverbuurman zag Hendrik doar zo stoan en wol ut ziende d’r van hebben. Hee stak de weg oaver en stiefelen op Hendrik an. Deze vertellen um in geuren en kleuren wat d’r hier aan de hand was. “Low proberen um te vangen”, zei buurman Herman, “dan heb wule mooi wat veur de middagpot.” “Ik bin anders niet zo gek op kniene”, zei Hendrik. Hee vuulen d’r eigenlijk niet zoveul veur um ut diertjen te vangen. Maar Herman zei: “As ie ut niet lust nem ik oe stuksien d’r wel bie!”
De beide keerls ging met un stok in de buize an ut pörken, maar ut knientjen verreuren zich veur gien meter. De beide keerls op de knieën de veur. Ut knientje gaf gien krimp. Ut blif gewoon op de plaatse zitten. Dat leek Herman niks en hee stellen veur om ut anders te goan doen. Hee zei: “Ik goa effen un eerpelzak halen. Dan stop wule de zak an de ene kante van de buize en beure wule de buize op en plofte vanzelf in de zak!” Hee rap noa huus um un zak op te halen. Zo ezeg zo doan. Herman hield de zak goed vaste en Hendrik beuren de buize op. “Hoger, hoger”, blèren Herman en tegen Hendrik die al een flinke rooie kop kreeg van ut zwoare beuren. Inens schoat d’r wat in de zak. “Wie heb um”, zei Herman en knuppen de zak goed dichte. “Verduld Hendrik dat is nog un beste zwoaren, dat wordt un lekker moaltjen”. ”Ja, ja”, zei Hendrik, “dank zij mien hulpe, want in knienen vangen bi’j niet zo best.” “Kan best wezen”, zei Herman, “maar dissen heb wie toch wel mooi te pakken,” en hee liep op huus an.
Hendrik kon ut niet loaten um toch nog effen in de buize te kieken en zei: “Herman kom toch is kieken d’r zit d’r nog ene in?” Herman zei: ”Hoe kan dat noe, hee zit hier toch in de zak?”. Hendrik zei nog: “Maar wat he’j dan in die ouwe zak zitten?”. Herman zetten de zak neer keek in de zak en wat zat d’r in?? Un tosse gres! “Hoe is dat noe meugelijk”, zei Herman nog wat beteuterd. Hee keek ok in de buize en heuren Hendrik nog krek effen lachen. En ut knientjen? Die maken van ut lawaai gebruuk deur d’r rap uut te vliegen en weg was hee in ut kreupelholt. Weg lekker boutje en Herman gloepend hellig.

Goed goan,
Martien, de Platschriever uut Loenen

Liever kleine daden dan grote woorden

Lees ook

Retrospectief: De Molen-Allee in Loenen

Rondom de (voormalige) bezittingen van het kasteel Ter Horst loopt de oude weg: Molen-Allee. Een …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.