Home / Alle-Regiobode / Foi,Foi: Schoorsteenproblemen

Foi,Foi: Schoorsteenproblemen

Ut huus van Dorus was al niet best meer. Hee had d’r al wat an loaten opknappen maar noe was de schoorsteen lek. In ut veurjoar kwam de metselaar bie Dorus um ut karwei op te knappen. Ut was un flinke klus, want eerst mos den olden af ebroaken wörden en dan un nieuwe opmetselen.
De metselaars waren d’r knap druk mee. De zuunige Dorus keek van un afstand steeds hoe of ut ging. O, wat ging um dat an ut harte as die keerls effen met mekare stonden te proaten. Hee hiel ok krek bie wanneer ze ’s margens begonnen en weer noa huus gingen. De bouwvakkers hadden al rap deur met wat veur un knieperig volk ze te doen hadden. Ze kregen ’s margens wel koffie maar dat was maar ene komme en nog half warm ok. “Dat dut die vrouw d’r extra umme, zei de opperman tegen zien moat, “dan hoef wiele niet zo lang te bloazen. Ze kunt hoast niet wachen met ut meenemmen van de kommen töt wie ut op eslobberd heb. Ok gien kuuksien d’r bie. Zo geet ut ’s middags met de thee ok. Gisteren deden ze ok krek of ze niks heuren of zagen toen wiele de vlagge in top hadden. Wat un knieperig volk. Gien pilsjen of wat anders kan d’r af. Maar wie zölt ze wel kriegen. Wiele heb hier ut karwei toch af en goat noa un andere klus. Ze komp d’r mooi met op de koffie, dat zult ze wel zien!”
Zien moat was ut doar roerend mee eens. De metselaars leverden un mooi stuksien wark af. Netjes rech en glad. Dorus mos ut toegeven dat ut keurig was maar ok gien pilsien toen de lui weggingen. Hee vond dat de bouwvakkers goed betaald wörden, die konden hun eigen bier wel kopen.
Dorus had binnen ok un mooie nieuwe open haard ekregen en un noe dus un nieuwe schoorsteen op ut dak. Hee had binnen en buuten al bekeken dat ut mooi was. Hee kon binnen zo deur de schoorsteen noa boaven kieken. Dat mos trekken as un liere.
Maar wat gebeuren d’r? Toen ut in de harfst kold wörden pakken Dorus wat aanmaakholtjes en wat klossen um de open haard an te maken. Hee stak ut an en meteen was ut al mis. De kamer stond direct vol met rook. De schoorsteen trok gien mieter. Dorus snappen d’r niks van. Hee is ut dak op egoan en van boaven met un zaklanteerne de schoorsteen te bekieken. Alles was prima in orde. Ut licht viel beneden mooi op ut rooster. Toch wol de heerd niet trekken. Ra, ra hoe kon dat?
Hee dadelijk ebeld noa de annemmer. Helaas was ut bedrijf deur overname d’r niet meer. Noe mos hee d’r un ander bie halen. Die snappen d’r ok gien zak van. D’r zat niks anders op dan de schoorsteen weer af te brèken. Toen kwam de oorzaak an ut licht. De metselaars hadden d’r halverwege un stuk blank vensterglas in emetseld die mooi al ut lich deurgaf maar gien rook. Wat hef Dorus dat un geld ekost. Heel bar. Hee kon niks meer verhalen. Hellig dat hee was… Toen de buren dat heuren zeiden ze: “Dat kump d’r van a’j de metselaars dreuge loat stoan…”

Goed goan
Martien, de Platschriever uut Loenen

Kinder gif altied iets te klagen, maar ut bint de allerbeste blagen

Lees ook

Business & Shopping: Nieuw verplicht energielabel vanaf 1 januari

DIEREN – Iedere woningeigenaar is op straffe van een boete verplicht om bij de overdracht …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.