Home / Alle-Regiobode / Foi, Foi: Vuur

Foi, Foi: Vuur

Ze zek wel is die luu leef as kat en hond. Ut volgende verhaal geet oaver Dora en Janus, die niet zo’n best huwelijk hadden. Dora en Janus hadden samen un boerderië an de andere kant van de Iessel. Dora was vrogger in heur jonge joaren un merakels mooie meid. Un bult jongens zaten d’r achteran te ruuken en snuffelen, maar ze vond geen van allen goed genog. Nee, Dora koos veur Janus, un stoere boerenzoon. Ja, en zien vader was un grote boer. Un best bult koeien en dat gaf vrogger anzien.
Ut kwam zo an: op de joarlijkse karmse waren d’r heel wat jongens die un oogjen hadden op Dora. Ze zag d’r ok heel verleidelijk uut met un mooi kort roksien an en zee had de blouse ok mooi vol. Ze waren mooi op eknup en niet zoals laats iemand zei: “Das ok gien gezichte bie de vrouw: ze hef de keune lös in ut hok lopen.” (Doar bedoelen hee mee dat de vrouw gien beha droeg).
In de danstente raken beien an ut dansen en zo raken de verkering an. Noa un tiedjen verkering gingen ze trouwen. Ze trokken bie de olde luu van Janus in. Eerst leek ut d’r nog wel op dat beien ut bar goed met mekare konden vinden, maar Dora veranderen wel un bitjen. Ze wörden un zuunig en hebzuchtig wief woar Janus ut niet best bie had. Maar Janus was zeker gien doetjen die zich deur un vrouw de wet liet veurschrieven. Oh, nee, hee ging gewoon zien gang. Hee was bie un biljartclub, ging in de kroeg kaarten, was bie de schietvereniging en wat al niet meer. Ut veurnaamste was dat ut zich afspeulen in ut café. Want doar was hee meestal te vinden. En altied de piepe d’r bie an van de vrogge margen töt de late oavond. Töt grote argenis van Dora, want meestal kwam hee ladderzat in huus. Wat hef Dora op die keerl van heur efoeterd. Och en ut was zo un beste keerl, maar ja de drank dat deed ut um, doar kon hee niet afblieven. Janus vermaken zich wel, steuren zich niet an ut gedram van zien vrouw en wörden d’r nog old bie. De boerderie had hee al aover edoan aan zien zoon en op un dag deed hee de ogen dichte. Hee vond ut goed zo en vond dat hee nog un best lèven had ehad, al had hee un echtgenote anders veur esteld. Dora vond ut ok niet arg dat Janus op un dag ut tiedelijke veur ut eeuwige verwisselen. Ze was d’r niet rouwig umme. De begrafenis wörden eregeld en noa un paar dagen stonden ze noa de uutvaartdienst bie ut graf. Iedereen kennen Dora as un mense die krek zei woar ut op stond woar zee ok was. Noa de uutvaartdienst stond zee bie ut graf en gooien zien piepe en un buul met rooktabak in ut graf op de kiste en zei nog: “Nou Janus dat is veur oe, nem de piepe en tabak maar mee. Lucifers hoef niet want woar ie bint is, denke ik, vuur genog.” Inplaats van droefheid stonden de umstanders wat te gniffelen bie ut graf um disse (woare ?) laatste woorden….

Goed goan,
Martien, de Platschriever uut Loenen

Luuster noa ieders kritiek, maar hol oe eigen mening

Lees ook

Business & Shopping: Heerlijk Italiaans eten bij Pizza Limone op Landal Coldenhove

EERBEEK – Vrijdagavond 29 november opende op Landal Greenpark Coldenhove in Eerbeek het nieuwe Italiaanse …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.