Home / Alle-Regiobode / Foi, foi: De Pincode

Foi, foi: De Pincode

Berend had zien eigen wagen in de garage. Veur de APK en d’r mos un een en ander an gebeuren. Pech. Noe mos hee krek met zien vrouw onverwachts noar ut ziekenhuus.
Zien vrouw bellen um op bie de baas of hee mee wol goan noar ut ziekenhuus. Berend zei tegen heur dat ut bar slech uutkwam noe hee gien auto had. De baas heuren dat en deed un royaal gebaar. Berend moch zien wagen meenemmen. Un mooie nieuwe BMW. As beveiliging zat d’r un pincodeslot op. Zien baas schreef um op un klein papiertje hoe de cijfercombinatie was. Hee mos dat rap uut de kop leren en dan ut papiertjen weggooien.
Berend kreeg de auto mee. Hee schrok d’r wel un bitjen van zo’n mooie wagen. Doar kon hee de blits meemaken. Tik, tik effen de code intoetsen en doar reed Berend hen.
Thuus effen zien Dora ophalen en toen noa ut ziekenhuus. De auto zweven oaver de weg, sjonge wat un puike wagen was dat toch…. Hee was zo trots as un pauwe met duizend veren in de start.
Ut onderzoek van Dora viel arg mee en noe ze toch in de grote stad waren wol zee toch wel effen winkelen. Dat effen wörden un paar uur. Twee uur lang deur de stad lopen gengelen.
Samen kwamen ze muu en lamlendig bie de auto an. Derk verheugen zich op ut ritjen met de mooie wagen. Sjonge a’j toch zo’n hoop geld heb um zo’n auto te kopen. Ut was zien grote droom. Hee in de auto met de sleutel maar toen kwam ut d’r op an. Veur de start eerst de pincode intoetsen. A’j ut weet is ut gemakkelijk. Berend menen dat hee ut goed had onthollen. Hee deed tik, tik maar ut bleek niet goed te wèzen. Hee mos heel diep noadenken hoe het noe toch wel was?. Berend menen ut te weten en toetsen nog un keer de cijfers in maar… weer verkeerd. Hee raken un bitjen in paniek. Ut zweet brak um uut. De darde keer moch ut niet verkeerd goan, want dan ha’j de poppen an ut dansen. Hee wist ut niet meer. Woar was dat papiertjen noe toch??. Hee vuulen alle zaken noa. Alles binnenste buuten ekeerd, maar niks heur. Un bult rommel maar gien pincode. O ja, hee herinneren ut zich weer. Onderweg had hee ut papiertjen met wat andere rommel op un parkeerplaatse in de container edoan. Woar was dat ok al weer. Ja, hee kon ut zich nog herinneren.
Hee wol zien baas niet opbellen, want dan sloeg een un flater van jewelste. Hee nam de busse en ging terugge noa de plekke woar hee ut papiertjen vot had egooid. Berend zuuken en zuuken maar ut was nargens te bekennen. Hee zetten de hele bak op de kop maar niks heur ut was d’r niet.
Wat noe toch te doen? Hee weer terugge noa de auto en Dora. D’r zat noe toch niks op dat zien baas te bellen. Sjonge, sjonge wat had hee de pest in. Ku’j wel noagoan hoe dat gesprek ewes is. Maar ja, hee mos toch terugge. Wat d’r op de terugweg noa huus is zeg zul wie hier maar niet herhalen…

Goed goan,
Martien,
de Platschriever uut Loenen

Een joartje older, un hoartjen griezer en zoveul dagen wiezer….

Lees ook

Een Stief Kwartiertje: Terug naar het voorjaar

Het is vermoeiend en iedereen zal het beamen: het virus beheerst momenteel ons leven, de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.