Home / Alle-Regiobode / Foi,Foi: Kold en warm buffet…

Foi,Foi: Kold en warm buffet…

Ik ken un keerl die al aardig wat hef mee emaak. Deur zien wark hef hee heel wat van de wereld ezeen, maar noe is hee op un lèèftied dat hee graag bie Moe in huus is. Ok noe maak hee nog wel wat mee. Mo’j is heuren wat ik van um vernam…
Hee had uutnodigingen ekregen veur Amerika en uut Brabant veur un receptie van un olde bekende. Hee wist dat ze doar altied arg royaal bint. Tegen zien vrouw zei hee: “Wie goat door hen. Goa nu maar is mee. Dat wördt un leuke receptie met kold en warm buffet.” Dat lussen die snaaiert wel en zien vrouw was d’r ok niet vies van.
Ze gingen als vrog op pad want ut was un ende riejen. Ze waren ruumschoots op tied in de plaatse woar ut feest was. De vrouw zei nog: “Loat wie eerst iets goan èten, want ut kan nog wel effen duren.” “O nee”, zei de man, “dat vind ik zunde, want dan heb wie straks niet zoveul trek meer.”
Um de tied kapot te kriegen heb ze maar un hötjen op un terrasjen ezèten en thee edronken. Zonder gebak natuurlijk.
Ut wörden tied um noa de feestzaal te goan. Ut was d’r arg gezellig, echt op zien Brabants. Hee had twee biertjes op en ging toen an de cola want hee mos nog terugge noa huus riejen.
Ze kwamen met lekkere hapjes rond maar beien deden d’r niet an mee. Ze zollen met ut kold en warm buffet de schade wel inhalen, hoewel de buuk wel un bitjen begon te jeuken. De mage begon um ok un bitjen op te speulen. Ujt wörden hoog tied dat de toafels evuld wörden met lekker warm en kolde gerechten.
Ut duren heel, heel lange, maar eindelijk wörden d’r ezeg dat d’r un warme hap tot besluut kwam. De man zei: “Net op tied want ik starve bienoa van de honger!” Maar inplaats van un toafel met alle lekkere dingen d’r op, kwam d’r un deerntjen met un blad an met veur iedereen un schotteltjen met twee stoksies satè en un servetjen d’r bie…. De man zag dat en zei wat hellig tegen zien vrouw: “Wat un ramp. Was ik ok mar noa Amerika egoan, dan had ik ieder geval in ut vliegtuug nog goed te èten ekregen.”
Hee zat aardig met de mage in de warre. Op de terugweg noa huus keek hee oaveral of hee un bordjen van MacDonald zag maar alles zat al dichte.
In huus keek hee meteen in de koelkasten of d’r nog iets in lag van zien gading want met zo’n lege mage wol hee niet ut berre in. Hee hef nog gauw un paar eier me un paar platen ham in de panne eklets.
’s Nachts hef hee liggen dromen van lange toafels met allerlei lekkere snuusteriën d’r op. Wat was hee d’r gelukkig mee, maar toen hee wakker wörden had hee d’r toch nog un bitjen un kater van hoewel hee nauwelijks alcohol had edronken. Hee nam zich veur d’r de volgende keer niet op zoveul te rékenen en gewoon op tied wat te éten, dan viel ut op ut feest altied mee…

Goed goan,.
Martien,
de Platschriever uut Loenen

Hee zut wel de splinter in andermans ogen, maar niet de balk bie umzelf

Lees ook

Rick Evers: De loper

Vroeger zag ik altijd een man die liep. En op zich is dat niet zo …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.