Home / Alle-Regiobode / Foi,foi: De zwarte katte

Foi,foi: De zwarte katte

Dina was kats van streek. Heur mooi zwarte katte Moortje was vot. Nargens te vinden. En Dina was toch zo gehecht an ut dier. Ut was un pikzwarte katte. Veur Dina was ut un lief dier, maar Drikus heur man, vond d’r niks an. Hee kon niet met ut dier opschieten. As hee ut wol aaien, kreeg hee vake un höker (krabbe) van de poes. Un vals karakter zat in de katte en dat zat Drikus niks lekker.
Noe was d’r trammelant. Moortjen was vot. Dina zoch oaveral in huus en buuten. Woar zol dat stomme dier noe toch kunnen wèzen? Ze had um op de gewone tied ‘s margens noa buuten edoan en noe was hee vot. Wat te doen? Ze wörden un bitjen treurig en mieterig umme de poes. Ze was zo gewend met de poes um heur hen, lag op heur schoot en noe gien Moortjen meer. Toen de katte de volgende dag ok vot bleef zei Dina tegen heur man dat ze un advertentie wol zetten in de krante. De katte mos hier argens in ut darp rondzwarven. Zee was zo gehecht an ut dier dat was heur heel wat weerd. Ze ging de advertentie opgeven en liet d’r biezetten dat de beloning van ut terubrengen un tientje was. De advertentie zol de volgende dag in de krante kommen.
Woensdags mos Dina weg op kroamvisite in de buurte en dat was af esproaken. Drikus mos thuusblieven want as iemand kwam met Moortjen dan mos d’r ene thuus wèzen.
De krante was nog maar kold bie Drikus in de busse of doar wörden al an ebeld. Doar stond un keerl met un zwarte katte op de arm. Hee zei: “Ik heb oele zwarte katte evonden. Hee liep doar un paar stroaten varder. Hier ie mag um hebben en mag ik ok dat tientje vangen?” Effen later weer iemand an de deur, weer met un zwarte katte bie zich. Hee beweren bie hoog en lege dat ut Moortje was. Drikus riep nog un keer Poes en Moortje en de katte miauwen (van honger)wat. “Zie wel”, zei de man, dat is oele katte.”
Un half uur later ging de belle weer. Verduld noe un meisje met un poes. Weer un pikzwarten. Drikus zei dat ze al twee poezen hadden maar zee wist um te oavertuugen dat ut Moortje was. Ook zee kreeg un tientjen mee noa huus. Blie dat ut kind was, maar hee zag niet dat ut meisje meteen noa ut cafetaria ging.
Un uur later kwam Dina thuus. Drikus dach dat Dina blie was maar niks heur. Integendeel, zee was gloepens ondeugend. Zee bekeek de katten die oaveral op en tussen zatten. De meesten waren gewoon zwarfkatten die de luu effen hadden evangen um un tientje op te strieken. Zee zag metene dat heur Moortjen d’r niet bie was. Direct ging de deure lös en alles noa buuten toe. Vot d’r mee.
Wat later ging ze noa de veurkamer, woar ze heel weinig kwamen, en wie lag doar lekker te sloapen in de luie stoel? Juust: Moortje. Dina weer blie. Drikus was intussen noa de kroeg um al die narigheid van de rotkatten te vergèten….

Goed goan,
Martien, de Platschriever uut Loenen

‘Die bie alles ut beste is, is ut slechtste veur zichzelf’

Lees ook

Foi, foi: Ophokplicht

D’r bint mensen die nemp sommige veurschriften al te letterlijk. Van de oaverheid krig un …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.