Home / Alle-Regiobode / Foi, foi: De nachtspiegel

Foi, foi: De nachtspiegel

In un darp oaver de Iessel wonen (joaren elejen) un vrouw die vake ‘de nachtspiegel’ wörden enuump. Wel un rare naam veur un vrouw. Toos zei ok altied as zee noa de WC mos: ‘Hol mien stoel bezet, ik mot goan nachtspiegelen’. Wel raar geproat natuurlijk. D’r wisten maar weinig mensen woar dat noe vandan kwam. Toen d’r un nieuwe buurvrouw kwam wonen en buurte maken vroeg zee gewoon (wat brutaal) op de vrouw af: “Zeg Toos noe mo’j mien toch is vertellen hoe ie an die bienaam komp?” “Mo’j is heuren”, zei zee, “ik zal ut oe vertellen. As jong deerntje van vieftien joar mos ik in betrekking. Wule waren thuus met un flinke koppel en hoe eerder a’j wat verdienen hoe bèter. En dan nog graag veur dag en nacht d’r uut.”
“Ik mosse met vieftien joar al in betrekking in Arnhem bie rieke luu die in un groot herenhuus wonen. Deftige luu! Ze proaten met un heite eerpel achter in de kèle. Ie kent dat wel. Maar ja, ik was niks gewend en mos nog hèèl veul leren. D’r waren zoveul dingen woar ik niks van wist. Dat hadden wule op de boerderie toch niet. Maar ja ie mossen ut eerst allemoal wel leren en weten. Ut begon al meteen op de eerste dag. Ik moch niet in de kamer èten met mevrouw en meneer. Nee, ik zat allene in de keuken te prakken. Ok niet gezellig. Toen ging ut belletje. Ik dach dat ze nog in de woonkamer was. Ok kieken in de keuken en doar was ze ok niet. En toen zag ik ut. Mevrouw stond op de oaverloop en riep noa mien: “Zeg Toos wij gaan naar bed, wil je de nachtspiegel even hier boven brengen?” “De nachtspiegel?”, zei ik. “Ja”, zei mevrouw, “ik denk dat die in de keuken is.” Ik zei toen netjes: “Ja mevrouw, ik zal er voor zorgen.”
“Ikke noa de keuken toe en ik prakkezeren mien rot, wat bedoelen dat mense noe toch met un nachtspiegel, doar had ik nog nooit van eheurd. Ik keek in de keuken en zag doar wel un klein goedkoop spiegeltjen hangen. Ik pakken ut d’r af maar toen dach ik dat zal ze niet bedoeld hebben. Toen maar weer effen varder kieken, maar niks te ontdekken. En um noe meteen al te zeggen, ‘ik kan ut niet vinden’, dan maak ie ok un slechte indruk. Ik zag in de hal die grote spiegel stoan en bedach mien dat ze die wel bedoeld zol hebben. Ik proberen um die zwoare spiegel boaven te kriegen. Toen ik halverwege de trappe was en natuurlijk wel wat gehijster te heuren was, kwam doar inens meneer en mevrouw boaven an de trappe loeren. “Wat doe je nou toch met die spiegel Toos?” Ze dachen dat d’r un inbrèker gangs was. “Nou ik breng u de nachtspiegel”, zei ik netjes. Nou toen ha’j ze is moeten zien lachen. Ze proesten ut uut. En ik maar wachen met die grote spiegel op de trappe. Toen ze bedaard waren kwamen ze noa beneden en vertellen mien dat ze met de nachtspiegel de nachpo (pispot) bedoelen. Foi, wat schamen ik mien toch en heb ut nooit meer verkeerd edoan. Noa die tied zeg ik altied: “Ik goa nachtspiegelen. Snap ie??”

Goed goan,
Martien, De Platschriever uut Loenen

Zo lang a’j nog niet in de hemel bint he’j geld neudig!

Lees ook

Rick Evers: Flauwekulrecord

De 34-jarige Keniaan Eliud Kipchoge liep afgelopen week als eerste mens een ‘marathon’ onder de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.