Home / Alle-Regiobode / Foi,Foi: Bargje op

Foi,Foi: Bargje op

Jan en Mien gingen samen op vakantie met Bart en Willy. Bart was vaker noa ut buutenland ewes en had deurumme weinig moeite met de wegen. Ut was wel ut alderbastend ende vond Jan um noa Oostenriek te goan, maar beiden wollen noe toch wel is zien wat ze wel is op de televisie hadden ezeen. Die mooie vargezichten dat wollen ze noe wel is met eigen ogen bekieken. En misschien ok nog wel noa die mooie muziekoavonden want Jan en Mien waren bar gek op die Oostenriekse muziek.
Op un dag vertrokken ze richting Oostenriek. De lange weg d’r hen viel beiden niet tegen. D’r kon vlot ereden wörden. ’s Margens gingen ze vrog weg en ’s oavonds waren ze op de plekke woar ze wollen wèzen. Onderweg keken ze de ogen uut. Wat un mooie natuur doar. Zo mooi hadden ze nooit verwacht.
In ut hotel was alles goed eregeld. Ze kregen mooie ruume kamers noast mekare en dat was wel handig as ze ’s oavonds nog wat wollen kaarten en un jong borreltjen nemmen.
Alle dagen gingen ze vot. Soms un ende kuieren deur de bulten of met de auto. Bart was d’r al vaker ewes en wist de mooiste plekjes op te zuuken. Ze zollen ok nog un paar hoge bargen opzuuken. Op weg noa un hoge barg zetten Bart halverwege de auto langs de kante. Ze hadden doar toch zo’n mooi uutzicht. Ze liepen doar zo langs de weg en keken van zich af. Druk was ut niet en deurumme konden ze ok langs de weg lopen. Jan keek wel un bitjen raar op toen d’r un keerl met un auto langs kwam die achtereerts (achteruit) met de zien wagen de barg opreed. Wel un bitjen un raar gezichte, maar in ut buutenland zie’j op vakantie wel meer gekke dingen. Ie kunt oe nargens meer oaver verbazen. Die keerl in die auto stoppen ok effen op die plekke. En kwam uut de auto um un sigaretjen te roken. Dat kon hee niet loaten en mos noe effen wat paffen. Jan raken met die keerl an de proat. Eerst oaver ut weer ut mooie land. Ut was un keerl die ok Hollands proaten. Jan dach dat ut un Belg was. Hee was toch wat nieuwsgierig en vroeg an um weurumme hee achtereerts noa boaven ging. “Nou”, zei de man, “heel eenvoudig. De weg noa boaven wordt steeds smaller. En ik denke dat ik boaven niet dreeien kan. Ik nem ut zekere veur ut onzekere en goa zo noa boaven. Ik zit alle dagen achter ut stuur. Doar heb ik niks mee te doen”. Jan knikken, toch niet gek bedach van die keerl. Effen later gingen ze allemoal weer vertrekken. Loat Jan noe later op de dag die keerl weer zien en noe kwam hee achtereerts noa beneden toe. Weer met die keerl an de proat. “Ja”, zei de keerl, “ik dache dat ik niet dreeien kon maar dat kon boaven toch wel. Dat he’k eodan en binne zo weer noa beneden egoan…”. Jan wist niet wat hee mos zeggen, schudden de kop en dach wat hef de Heer toch rare kostgangers…

Goed goan,
Martien, De Platschriever uut Loenen

De optimist hef ut krek zo vake mis as de pessimist, maar hee is wel un stuk gelukkiger

Lees ook

Business & shopping Wimperium -Drempt opent de deuren

DREMPT – Vanuit haar nieuwe Beautystudio met de naam ‘Wimperium-Drempt’ in (achter)Drempt, wil eigenaresse Alice …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.