Home / Alle-Regiobode / Foi, Foi: Ziek

Foi, Foi: Ziek

Ie heurt van oldere mensen vaak nog interessante verhalen oaver vrogger. Mooi bint ze eigenlijk niet want vake gif ut an dat de mensen toch wel un bitjen bekrompen waren.
Dit keer wol ik ut hebben oaver Dientje. Un aardig deerntje die die vrog bie de boeren an ut wark mos. Deurleren was d’r niet bie. D’r mos geld verdiend worden en in dat leren zagen de olders niks en zeker niet veur un vrouw. Die mos meteen in betrekking um de huusholding leren. Dientjen mos met zestien joar ok in betrekking. Meteen al veur dag en nacht. Ut leek heur niet maar ja ie hadden maar te doen wat de olde luu zeien. Zee kwam te warken bie un grote boer. Ut was un bar zuunige boer in un paar darpen varder. Hein was un dikke boer en hee was etrouwd met Trui uut etzelfde darp. Ut was un dochter van un grote boer. Ja, dat ko’j vrogger ut beste doen, want un boerendochter die brach wat mee en wist meestal van anpakken.
Hein en Trui waren alderjekes zuuning. As ze ut effen konden redden bleef de knippe dichte. Dientje mos an ut ende van iedere moand bie Trui altied drammen en schooien um de centen te kriegen en dat was eigenlijk maar un heel klein bitjen. Trui zei vake: “Dientje wule heb disse moand grote onkosten ehad. Wule kunt ut niet betalen. Ie mot effen geduld hebben”. Geduld had Dientje wel maar…. met moate. Ut worden heur toch te bar um iedere moand zitten te schooien um ut geld dat heur toe kwam. Zee had d’r hard veur ewark. Op un keer dach Dientje: “Zee kunt mien de pot op. Ik wark niet meer veurdat ik mien geld ebeurd hebbe.”
De volgende dag kwam Dientje niet uut berre. Ze bleef gewoon liggen. Zee deed krek of zee slim ziek was. Trui begreep d’r niks van en dach bie zichzelf: Dientje zal wel slim de griep hebben, ut liek mien bèter um de dokter maar effen te loaten kommen, want as zee lange ziek blif kan zee ok niet warken.”
Trui deed de dokter bericht en nog dezelfde middag kwam de dokter bie de boerderië van Hein en Trui. Effen later was hee bie ut berre van Dientje. Hee dach meteen: “Die zut d’r zeker niet ziek uut. Ut liek wel Hollands welvaart.”
De dokter pakken de pols van Dientje en de vroeg an ut deerntje: “Wat scheelte er aan. Wat mankeer je?” Dientje was eerlijk en zei: “Helemoal niks dokter…” De dokter keek wat raar op en zei: “Ben je niet ziek. Maar waarom lig je dan in bed?” Dientje antwoorden wat nuchter: “Nou kiek dokter, ze bint hier bar en bar zuunig. Ik heb al twee moand gien cent ezeen. Ik dach bie mien eigen: Ik ben nogal gek, gien centen ok niet warken. Ik blief gewoon liggen..”
De dokter gaf eerst gien reactie maar al gauw begon hee te glimmen en met un knipoge zei hee tegen Dientje: “Schik maar effen op Dientje. Ik heb van Hein en Trui al un joar gien geld ezeen….!” Hoe ut varder af elopen is vertelt ut verhaal niet…
.
Goed goan,
Martien, de Platschriever uut Loenen

Un bölleken handel is bèter dan twee vuuste vol wark

Lees ook

Een Stief Kwartiertje: Zichtlijnen

Het park Daalhuizen in Velp moet deels gesloopt worden om het in de oude glorie …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.