Home / Alle-Regiobode / Foi, foi: De ‘getatte’ fietse…

Foi, foi: De ‘getatte’ fietse…

Mo’j is heuren wat d’r is gebeurd… Ut deerntje uut ut gezin van Rob kan merakels goed zwemmen. Ze is doar un kei in en mot vake noa Zwolle toe um te trainen. Ze geet dan met de fietse noar ut station van Zutphen en varder met de trein. Dat geet altied prima.
Zundags mot ze ok vake wedstrijden zwemmen. Heur vader en moeder goat dan vake mee met de auto. Ze hoef dan niet met de trein mee. Wel net zo fijn, kan ze nog wat langer in berre blieven liggen. Pas elejen ging ut wat anders. Zundags had Pa wat te doen en ging pas later noa Zwolle. In ut zwembad keek hee noa ut zwemmen van zien dochter.
Rob nam ut deerntjen mee noa huus. De volgende margen wol de dochter de fietse pakken. Gien fietse te bekennen. Oaveral ekeken maar gien fietse in of um ut huus. Ze zei meteen in paniek: “Mien fietse is ejat. Pa mien fietse is vot. Wat vervelend noe toch, ut was nog un beste fietse en noe foetsie. Ik mot d’r weer ene kopen want ik mot d’r ok mee noa schole”.
Rob mopperen en drammen. Wat un vervelend gedoe noe toch. Hee nam d’r gien genoegen mee. Hee lichen de politie in en streupen heel Zutphen af of de fietse doar argens kon stoan.
Toen schoat um inens wat in gedachten. Ut gebeurt zovake dat jongeluu die arg verlègen bint um un fietse. Ze nuump dat gewoon ‘effen un fietse lenen’. Rob bedach dat dit bie zien dochter ok wel is ut geval kon wèzen. De volgende dag noa ut station in Zutphen. Hee hoeven maar effen te kieken en ja heur doar zag hee al de bekende blauwe fietse van zien dochter stoan. De fietse zat gewoon op slot. De ‘jatters’ hadden de fietse gewoon op slot edoan zodat ze die weer mee konden nemmen. Doar zol hee toch wel effen un stöksien veur stèken. Hee warken op un kantoor niet zo varre van ut station.
Rob de fietse op de nekke en doar sjouwen hee met ut ding deur Zutphen hen. Rob zweten mien toch toen mee met de fietse bie ut kantoor kwam, maar hee had genog verdiend: ut ding was terechte. ’s Oavonds met de fietse noa huus toe. Hee meteen d’r mee an ut wark um ut slot van de fietse te slopen want de sleutel was vot. De dochter kon weer fietsen. Un ander slot had hee nog wel in de schuure dus alles was weer veur mekaar. Wat zol de dochter blie wèzen. Toen zee un uurtje later thuus kwam was zee inderdoad arg blie maar mos töt heur schande wat bekennen.
Zee had bedach dat ze de fietse zundags zelf bie ut station had loaten stoan. Doar had zee niet meer aan edach toen vader Rob heur zundagoavond kwam ophalen. O wat stom van heur. Rob de pest d’r in. Hee had heel Zutphen af ezoch, politie ebeld, fietse van station op de nekke ehad, mee noa huus enommen en nog ut goeie slot deur ezaag. Allemoal veur niks. Hee nösteren en was eerst niks best te passe. Toen de dochter um beloaven via un relatie un kaartjen veur de voetbal te regelen was ut leed snel elejen…

Goed goan,
Martien, De Platschriever uut Loenen

Ut slimste van warken is da’j wat doen mot

Lees ook

Een Stief Kwartiertje: Zichtlijnen

Het park Daalhuizen in Velp moet deels gesloopt worden om het in de oude glorie …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.