Home / Alle-Regiobode / Foi, foi: De badkuupe

Foi, foi: De badkuupe

“Mina, mien schoonzuster, vertellen Jan, “die is heel wat mans. Zee hef de broek an en wat zee wil mot d’r gebeuren. Ze was noe op ut idee ekommen um un bad te hebben. Ut leek heur dat heel fijn. Volgens heur was de doucheruumte groot genog um d’r un bad in te maken. Hee zag bar tegen ut grote karwei op en was bange dat Mina ut tegen zol vallen en dan zat hee d’r mee. Mina drammen nog weer is en zei dat bie heur vriendin ok zo’n mooi bad was dat wol zee ok hebben. Hans kon d’r niet onder hen. Hee bedach zich dat hee dat eerst wel effen uut zol proberen. Maar hoe? Doar ging um un lichien op. Hee ging noa un slopersbedrijf en koch zich doar un bad: ie kent dat wel zo’n olderwets emaille ding met poten d’r onder. Hee zei ut nog duudelijk tegen Mina: “Ut is un pense met wark zo’n bad en ut kost un bult geld deurumme wol ik ut eerst uutproberen met zo’n lösse kuupe. Ik zet dat in de douche en dan ku’j krek zolang ie wilt in ut bad blieven zitten. Zeg ie dan, verduld wat is dat fijn dan maak wie dat”. Mina sputteren nog wat tegen maar zag toch wel in dat Hans un redelijk veurstel deed.
Un dag of wat later halen Hans de badkuupe op. Hee hoeven d’r maar un paar cent veur te betalen. Noa wat martelen en mieren stond de kuupe op de plaatse. Mina bekeek zich dat effen en was d’r toch wel blie mee en zei:“Ik goa vanoavond meteen in bad”. Hans mos ’s avonds noa de biljartclub en zee had mooi tied um in bad te goan. Zee had badschuum ekoch.
Ut ging toch anders dan zee edach had want wat gebeuren d’r? De kuupe ging vol warm water en Mina d’r in met heur ‘volle gewicht’. Eerst ging ut nog maar toen ze ging verzitten knappen de poten dubbel, naar binnen toe. Ie kunt wel noagoan wat d’r gebeurt met zo’n emaille kuupe. Hee zakken kats scheef. D’r uutgoan durven zee ok niet want zee wat bange dat de kuupe zol umme donderen en al ut water deur ut huus zol stromen. O, wat un ramp. Toen Hans noa un tiedjen binnen kwam heuren hee al ut geschrèèuw en gebleer. Hee zag Mina doar scheef in ut bad hangen en mos zich bedwingen um niet hard te goan lachen. Ut was un heel geheister um Mina uut ut bad te kriegen. Foi, foi, wat ging ut mense tekeur tegen Hans. Wat mos hee toch met zulke olde pruttel! Zee had un hele tied bedruk ezèten en de konte deed heur zo zeur. Hans zag ut al: de emaille stukjes zaten in de billen. Hee mos an ut pellen um alles d’r uut te kriegen… Wat reren dat mense toch: niet mooi meer. Hoe Hans ok zei dat hee d’r niks an kon doen, ut hielp niks. Zee zei hellig: “Ut bad d’r rap uut en d’r kump d’r ok giene meer in. Niks weerd dat nieuwerwetse gedoe. Ik blieve mien maar gewoon douchen”.
Hans zei maar niks meer maar lachen in zien vuusien. Verduld doar was hee mooi van un beste klus af ekommen….

Goed goan,
Martien, De Platschriever uut Loenen

Wie goed kan lachen is un goed mens

Lees ook

Business & Shopping: Nieuw verplicht energielabel vanaf 1 januari

DIEREN – Iedere woningeigenaar is op straffe van een boete verplicht om bij de overdracht …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.