Home / Alle-Regiobode / Foi,Foi: Peerde op hol

Foi,Foi: Peerde op hol

Kwajongens heb de luu in un darp(wat joaren elejen) mooi te pakken ehad. Jan en Frits mossen waken bie ut peerd dat un veulen zol kriegen. Ut duren en duren nogal. Ut schoat gien mieter op. Elke keer gingen ze kieken maar niks gien anstalten van de merrie umme te bevallen. Niks doen is niks veur jongens. Ze vindt dan natuurlijk van ondeugden uut um de tied umme te kriegen.
Varderop an de weg wonen um paar keerls woar beien un bitjen de schurf an hadden. Ze loeren d’r al un tiedjen op um ze pakken te kriegen, maar hoe?. Ut waren un bitjen kinderachtige keerls die de zunne niet in ut water konden zien schienen en vergaten dat ze zelf ok jong waren ewes. Ut was midden in de nach. Iedereen sliep al en de jongens zaten nog bie ut peerd te loeren en te wachen. Toen bedachen ze wat um effen bezig te wèzen en verduld ze kregen ok nog eer van hun wark ok. Eigenlijk metene al, maar nog meer de volgende dag. Hoe??
Jan en Frits waren un stel muiters die oaveral veur te porren waren en noe bedachen dat ze de luu an de weg wel effen wakker konden kriegen. Gien geschrèèuw of getoeter, nee maar deur gewoon te doen of ze un paar peerden waren die op hol sloegen.
Ze klabateren op hun klompen in ut goeie ritme oaver de weg hen. A’j niet bèter wissen dan zo’j denken dat d’r un paar peerde d’r vandeur gingen midden in de nacht. De beide jongens hobbelen deur ut darp hen. De luu heuren un hels kabaal buuten oaver de weg. Ut was un warme dag dus de ramen stonden oaveral wagenwied lös. Wat de jongens verwachen gebeuren ok. Op de meeste plekken heuren de luu wat, deden ut lich an en vloagen ut berre uut um op stroate te kieken woar die peerde bleven. Niks te zien natuurlijk. Toen de jongens midden in de darp waren gingen ze weer noar huus, want ze durven niet lange weg te blieven bie ut peerd.
De jongens deden de klompen uut en liepen veurzichting op kousen en voeten op huus an. Ze zagen oaveral ut lich an en wat luu langs de gordienen hen loeren. Wat hadden beien un schik.
De jongens wörden ’s margens deur hun vader af elöst en gingen noa berre. Jan ging later ut darp nog effen in um te heuren of de luu d’r nog oaver proaten. Nou dat deden ze. Ut was ut gesprek van de dag. Hee kwam ok nog bie de smid. Die keerl stond d’r toch te gapen. Hee had de sloap niet uut. Jan zei tegen um: “Keerl wat stoa ie nog te gapen. Ko’j niet sloapen?” “Och schei uut”, zei de man, “midden in de nacht komp doar toch un paar op hol geslagen peerde deur ut darp hen roazen. Ik heb ze niet ezeen maar mien vrouw wol niet hebben da’k noa berre ging want ze was bange dat ze bie ons de boel kapot zollen lopen”.
Wat had Jan doar un schik van, want hee had nog iets te verrèkenen met de smid. Ongemark was de stand noe weer gelieke…

Goed goan,
Martien, de Platschriever uut Loenen

‘A’j de mensen leert kennen, goa ie van de dieren hollen’

Lees ook

Appeltaartjes voor de gasten van de Zonnebloem

REGIO – De gasten van de Zonnebloem regio Veluwezoom werden de afgelopen tijd verrast met …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.