Home / Alle-Regiobode / Foi, foi: Cognac

Foi, foi: Cognac

D’r bint nogal wat keerls die graag un cognacjen drink. Eigenlijk is ut vieux maar in de volksmond zek wie allemoal gewoon cognac.
Ik was laats met un paar vrouluu an de proat toen ik argens in disse streek op un terrasjen zat. Af en toe mo’j dat is doen. En a’j dan wat bekende gezichten ziet dan raak ie umlieks an de proat. Zo ik disse keer. De vrouwen, die buurtjes van mekaar waren, gingen d’r samen op uut. Een buurvrouw was niet meer zo vlot ter been en de ander wol wel un endje met heur in de rolstoel wandelen en dan natuurlijk effen argens anstèken veur un komme koffie. Wule kregen ut oaver drankjes van noe en vrogger en toen vertellen een van de vrouwen un verhaaltjen oaver cognac wat luu uut dit darp is oaverkommen.
Vrogger namen de keerls noa de fabrieken, die meestal in ploegen warken, drinken mee. Koffie maar vake wel kolde thee. In de fabrieken was ut meestal knap heite en dan is kolde thee goed veur de dörs.
Jan nam elke dag ok kolde thee mee noa de fabriek. Hee deed dat in een kruksien en dat ging al joaren heel goed zo. Maar op un dag ging ut verkeerd. Verduld, hee kon ut kruksien toch nargens vinden. Woar was dat toch? Zien vrouw was d’r niet en hee wol toch wat meenemmen. In de kelderkaste zag hee un leuge flesse cognac stoan. Och ja doar kon ut wel mooi in. Hee goat de thee in de flesse en rap noa de fabriek toe.
Ut was nogal un grote flesse en hee maken de thee niet helemoal op en zetten die maar weer effen uut ut zicht in de kelder. Hee mos nog bie de kinder un klussien doen. Toen hee thuus kwam zag Jan dat d’r visite was. Zien breur kwam met zien vrouw op visite. Af ent oe mo’j toch is bieproaten. Truus gaf de visite eerst un paar kommen koffie met un plate koeke. Annie wol wat limonade, maar Gait had wel zin in un cognacjen. Ja, dat had Truus misschien wel in huus. In de kelder vond zee wat.
D’r wörden gezellig deur eproat oaver de feesten in de familie die in antoch waren. Ondertussen schonk Truus un paar cognacjes in veur Giat. Hee nippen wel un bitje raar an un glaasien maar nam toch un slok. “Verduld”, dach hee, “ut is gien cognac maar kolde thee. Ze wilt ons natuurlijk te pakken nemmen. Doar ken ik ze wel veur.” Gait zei niks en nam d’r nog un paar. Hee proaten gewoon mee. Ut drankje leek ok krek cognac. Wat later kwam Jan thuus en keek op toafel. En wat zag hee doar? Truus schonk cognac. Dat was toch op. Toen ging um un lichien op. Verduld, Truus had zien olde kolde thee eschonken uut de cognacflesse. Ja, toen mos Jan natuurlijk wel met ‘de billen bloot’, de woarheid veur de dag kommen. Wat had Truus doar un gloepens hèkel an. Zee kreeg d’r un rooie kop van. Maar ze heb d’r samen smakelijk umme lachen en Jan hef rap un flesse met echte cognac ehaald. Noe wach Jan op de tegenzet van zien breur.

Goed goan,
Martien, de Platschriever uut Loenen

Oe argste gebrek is a’j oe eigen gebrek niet kent

Lees ook

Retrospectief: De tram in de Koepoortstraat

Deze week bekijken we een Doesburgse straatfoto uit de jaren 1955-1957. We zien een motortram …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.