Home / Alle-Regiobode / FoiFoi: Rothond

FoiFoi: Rothond

Honden bint mooie en lieve beesten maar soms dan zo’j ze wat doen. Foi, foi wat Jan hef mee emaak. Hee kan d’r noe umme lachen maar toen niet. Wat was hee hellig in de huud. Wat hef hee zich liggen opdreeien in berre. Uren hef hee liggen foeteren. Wat was d’r an de hand? Jan en zien vrouw hadden ’s oavonds visite ehad. Gezellig eproat en un biertje edronken. Ut was al late ewörden en Jan liet de visite uut. Zien zoon had effen teveuren Tippie al uut eloaten, dus dat hoeven hee noe niet meer te doen. Noe kon hee zo noa berre toe.

Hee lag nog maar effen in berre toen ut gedonder begon. Buuten heuren hee un geblaf. Eerst nog zachies maar ut ging maar deur. Jan maar mopperen tegen zien vrouw, maar die sliep as un roze. Ze had un paar sherry’s ehad en was heel varre weg. Doar had hee ok gien steun an. Wat noe te doen? Hee berre in en berre uut. De hond bleef maar tekeer goan. Ut hield maar niet op.
Jan mopperen bie zichzelf: “Ut is zeker weer dat verrekte ding van hun un paar huuzen varderop. Dat hundjen kef d’r wat af. Dat ding hef gewoon gien opvoeding ehad. Hee mag zelfs nog in berre sloapen.” Zo lag Jan bie in berre in zichzelf te proaten en nösteren. Effen d’r weer uut noa de WC en weer proberen um te sloapen. Weer begon de hond buuten te blaffen en te janken. Un half uurtje zag Jan ut nog an en toen gooien hee de dèkens met un hellige kop van zich af en zei hardop: “En noe is ut uut. Verduld ik doe gien oge dichte. Wat un rothond. Margen mot ik d’r weer op tied uut en ik ligge hier maar kloarwakker umdat die keffer de kop niet dichte wil hollen. Ut kan mien gien donder schèlen. Ik nem mien un stok mee en dan zu’w wel is zien offe de kop dich wil hollen. Ik ligge noe al un paar uur wakker deur dat gedonder.”

Jan trok de bokse, sporthemp en sokken an en ging toen noa beneden toe. In de biekeuken had hee zien wandelstok stoan en hee nam ut ding mee noa buuten toe. Toen hee achter ut huus was en ut heksien lös deed wol hee links af goan noa zien buurman maar dat was al niet meer neudig want wie sprong door tegen um op? Tippie. Zien eigen hundjen die arg blie was dat zien baas um eigenlijk eheurd had…. Urenlang had hee motten blökken en blökken en hee kwam maar niet. “Verduld Tippie bin ie dat. Hoe is ut meugelijk dat ik wakker heb elègen van mien eigen hond. Och diertje toch wat heb ik op oe efoeterd. Ik had de stok al bie mien. Foi, foi, wat zielig toch da’j de hele tied buuten bint ewes. Kom maar gauw mee noa binnen.”
In huus hef hee Tippie effen vertroeteld en is toen nog berre egoan. Wel un bitjen kold, maar kon toen wel metene sloapen.
De volgende margen hef Toos ut verhaal eheurd en die mos d’r bar umme lachen. Tippie mot met ut uutloaten van de visite noa buuten wèzen eglip en ze hadden um bie ut noa berre goan niet emist. Jan moppert noe un stuk minder…

Goed goan,
Martien, de Platschriever uut Loenen

Winnaars geef nooit op en luu die ut opgeef wint nooit..

Lees ook

Business & Shopping: Coronaproof verwarmingsmaand bij Installatiebedrijf Smeijer

DIEREN – Zoals al jaren in deze periode houdt Installatiebedrijf Smeijer in Dieren ook dit …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.