Home / Alle-Regiobode / Foi, foi: Spiekerbokse…

Foi, foi: Spiekerbokse…

Foi, foi: Spiekerbokse…

In gedachen ku’j soms de raarste dingen doen. Later dan denke ie vake hoe heb ik dat noe kunnen doen. Maar zo geet dat a’j de kop argens anders bie heb. Ut volgende verhaal geet oaver un vrouw. Ok met zoiets. Veul keerls koop zelf niet hun kleren maar loat dat an de vrouw oaver. Derk had an Annie evroag um un nieuwe spiekerbokse te kopen. Zien vrouw wist wat veur moate Derk had en ging noa de winkel um d’r ene te kopen. Ze wol noe is un iets andere kleur en model want altied utzelfde begon ok te vervelen. Och ut maken Derk weinig uut, as hee maar un nette bokse an de konte had. Ok dit model passen um best alleen de piepen waren veul te lang. D’r mos wel un stuksien af. Dat was veur Annie gien probleem. Met noald en droad kon zee wel goed oaverweg. Zee wist wel hoeveul d’r af mos, doar hoeven gien extra noalden in. De bokse wörden effen weg eleg en Derk mos d’r un paar keer noa vroagen veurdat Annie d’r mee an ut wark ging. Zee had ut druk met van alles en nog wat.
Op un oavond ging zee d’r mee gangs. Ze wist nog precies hoeveul centimeter d’r af mos. De ene piepe had zee krek kloar toen d’r ebeld wörden. Stond doar un goeie vriendin veur de deure. Proaten en lollen noatuurlijk. D’r kwam gien ende an want ze hadden mekare zoveul te vertellen. Annie was aardig wat wiezer eworden toen de vriendin noa huus ging.
Ze zag de bokse liggen en dach loat ik dat noe maar rap effen afmaken want Derk hef d’r al in paar keer noa evroag. Zee pakken in gedachen de bokse weer op en begon de zeum van de broek weer lös te taarnen(peuteren). Ze was nog helemoal in de wolken oaver al die nieuwtjes van Thea en pakken zonder goed uut te kieken weer dezelfde piepe die ze eerder op de oavond al körter emaak had.
Toen de bokse bienoa kloar was kwam Derk binnen. Eerst wat nieuwtjes verteld van Thea en toen zei Derk: “Wat fijn dat ie aan de broek begonnen bint. Noe kan ik um margen mooi andoen. Loat is zien of de lengte noe goed is. Zal wel want ie weet dat krek”.
Derk pakken de bokse en trok um an. Wat un schrik… Hee zag ut al dadelijk en Annie kreeg de schrik van heur leven. De ene piepe was veul korter as de andere. “Hoe heb ik toch zo bar stom kunnen wezen. Ik heb dezelfde piepe twee keer körter emaak”, zei zee nog wat met un benepe stemme. Meestal had Annie de rebbel wel lös maar kon noe toch maar weinig zeggen. Derk zei heel wat anders. Niet zo netjes deurumme zul wiele dat hier niet herhalen. Iedereen kan zich doar wel un beeld van maken wat Derk tegen zien vrouw hef ezeg toen hee zag dat zien nieuwe broek noa de bliksem was, want d’r was gien redden an. De volgende dag hef Annie rap weer un nieuwe bokse ekoch. Gelukkig hadden ze nog dezelfde bokse en moate. Meteen körter emaak. Gien leed dus, alleen wat piene in de knippe…

Goed goan,
Martien de Platschriever uut Loenen

Fouten bint kansen um iets te leren

Lees ook

Foi,foi: Sinterkloas

Sinterkloas en zien gevolg hef altied iets aparts. Leuk veur de kinder. Tenminste zolang ze …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.