Home / Alle-Regiobode / Foi, Foi: Schoonmaak

Foi, Foi: Schoonmaak

Ut is noe veurjoar. Volop tied veur de schoonmaak. Zo ging dat vrogger tenminste. Ie hadden twee schoonmaaktieden: in ut noajoar en veurjoar. In ut veurjoar was de grootsten. Dat mos zo tegen Poasen alles glimmen en blinken. Ut hele huus wörden op de kop ezet. Alles van de plaatse en schoonmaken met gruunze zepe. Helder mos ut wèzen. En helder kreeg ie de boel pas a’j de de muren in de keuken, kelder en kasten ewit harden. Kalk halen bie de annemmer en met de kwast flink gangs.
De vrouwen maken d’r un sport van wie ut eerste de schoonmaak kloar had. Ze hielden in de buurte krek bie wie ut eerste de dèkens buuten had. Goed uutkloppen. Ok de wollen en gestikte dèkens. Ze waren d’r vrogger arg fitterig an. In de kamers gingen de matten d’r uut. Alles dweilen en schrobben.
In de kasten gingen alle glazen, koppies en wat al niet meer d’r allemoal uut. Nieuw kastpapier d’r in. Uutwitten. En natuurlijk alle glazen afwassen. Alles mos schoon wèzen. Dan ut spul d’r weer in. Wat un karwei. Ieder joar weer. Maar ze menen dat dit mos gebeuren. Zo ging dat in alle huuzen, groot en klein. Maar ok bie de grote landhuuzen en villa’s. De mevrouwen deden d’r natuurlijk niks an. Doar hadden ze (goedkoop) personeel veur. Meisjes en jonge vrouwen warken veur un paar cent van de vrogge margen tot de late oavond. Maar dan mo’j soms ok wel slim wèzen um ut veule wark af te kriegen.
Ut gebeuren in un darp kört bie de Iessel. In un grote villa wonen luu die flink wat geld in de knippe hadden. De ‘mevrouw’ had heel wat personeel veur ut grote huus. En natuurlijk mos d’r in ut veurjoar flink schoon wörden emaak. Foi, foi dat was mien un bult wark in die grote villa. Ut slimste(rotste) wark was nog wel die grote kasten(kabinetten). Alles mos d’r uut en de deerns mossen die grote kasten flink poetsen en wrieven en doarbie natuurlijk goed in de boenwas zetten. Un hels karwei. Mevrouw wol persè hebben dat ze bar mooi glommen. De deerns hadden heel veul te doen en dat mos allemoal in un paar wèken kloar. Schoonmaakster Dinie wist d’r wel wat op toen ze de grote kasten zag stoan. Un gloepens wark um die te poetsen. Was ok niet neudig want ze waren nog zo mooi. “Weet ie wat”, zei ze tegen de anderen, “wule wrief ze goed op. Maar mevrouw kan krek ruuken(of roeken) as wule niet veul boenwas heb gebruuk. Dat vindt ze altied zo helder ruuken. Wie nem flink wat klodders en smeert dat tegen de achterkante bie de mure. Goed smeren en uutwrieven. Doar zut gien mense wat van en ut scheelt ons un bult wark”. Ja, dat vonden de anderen un prima idee. Ze gingen gangs en ut was zo gebeurd. Noe konden ze mooi kalm op tied al ut andere wark afkriegen. Ut glom allemoal as un spiegel. Toen mevrouw de volgende dag kwam kieken, was ze goed te passe. Zee zei blie: “Wat is ut netjes. Ut glimt allemaal mooi en wat ruikt ut lekker! Mmm, echt een schoonmaakgeur. Goed gedaan!”. Wat heb de deerns stoan gniffelen toen ze dat heuren. Wie niet stark mot slim wèzen….

Goed goan,
Martien, de Platschriever uut Loenen

Alle liefde die’j geef kump uuteindelijk weer bie oe terugge

Lees ook

Retrospectief: De opgeblazen molen

Op 11 juni 1937 werd deze foto, onder de belangstellende blikken van een handvol passanten …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.