Home / Alle-Regiobode / Foi Foi: De hitsige papegaai

Foi Foi: De hitsige papegaai

Foi Foi: De hitsige papegaai

Ut kweken van vogels is veur un hoop mensen un leuke hobby die’j mooi bie of in huus kunt hollen. Ie hoef d’r niet veur de deure uut. En ie heb d’r ok niet veul ruumte veur neudig. Bie alle huuzen kan dat wel, ok in de nieuwbouwwijken of in un flat. Dan ku’j ze nog in un kamertje hollen.
In disse regio bint d’r nog wel heel wat vogelliefhebbers. Jammer dat ut aantal kwekers rap minder wördt. Dat kump umdat de jongeren dit niet meer wilt. Ze heb andere hobbies (of niet). Maar de vogelliefhebbers die d’r nog mee bezig bint doet dat nog wel heel fanatiek. Ut doel is natuurlijk um kampioen te worden. De hoogste clubeer en dan ook nog mee doen met un kringtentoonstelling, noa de Nederlandse kampioenschappen en a’j hele besten heb noa de wereldshow. In Voorst woont un vogelkweker die met zien dwergpapegaaien drie keer wereldkampioen is ewörden! Doe dat maar is noa! Nou die veugeltjes bint wel un paar cent weerd.
Ut bekendste veugeltje dat in un voliere wördt ehollen is zeker de kanarie. Van nature is de kanarie gruun, maar ze heb deur mutaties zomaar ok andere kleuren ekregen. Roooien, blauwen, nog gien zwarten.
Un dure hobby is ut eigenlijk niet maar de luu maak ut vake duur. A’j grote papegaaien kweek mo’j d’r flink veur betalen. Die kost soms wel duuzenden per stuk. En ie mot d’r altied twee hebben. Ut is levend spul, dus ze kunt ok nog ziek wörden en doodgoan. Weg geld…
Met vogels ku’j soms van alles beleven. Mooi en lillik. Maar wist ie dat un papegaai crimineel verdrag kan vertonen? Ja, dat is bewezen. Un vogelkweker uut disse streek hef dat mee emaak. Hee had flink wat duuvies woar hee mooie priezen mee hef behaald, maar ook wel wat kanaries en ander spul. In un kooi had hee un papegaai. Un grieze roodstart. Ut beesien zat doar zo allene. Toen hee van un bekende un mannetje kreeg an eboaden leek um dat wel. Kon hee d’r mee goan kweken. Beiden bie mekare ezet. Ut mannetje leek ut meteen wel maar ut vrouwtje (de pop) was wat veurzichtiger. Ze kroap af en toe wel in ut broedblok. Verduld, dacht de kweker, dat geet goed. Hee zag wel dat ut mannetje wat wol maar ut vrouwtje was d’r nog niet an toe. Hee marken un paar dagen dat ut mannetje veur ut gat van broedblok zat en ut vrouwtje niet. “Geet goed”, dacht de man, “zee is eier an ut leggen”. Noa un paar dagen ging hee toch is kieken en wat bleek noe? Ut vrouwtje zat dood in uut broedblok. Ut mannetje had heur uutehongerd. Hee kreeg zien zin niet, dus ut vrouwtje mocht d’r niet uur. Gien vrèten. Foi,foi, wat was de kweker gloepens hellig. Hee hef meteen ut hitsige mannetje in de kladden egrepen. In un kooi estop en weg ebrach noa un andere kweker. Hee wol ut rotbeest gien dag meer zien. De kweker is nog hellig as hee dit verhaal verteld. Hee had zich d’r zo veul van veuresteld. Gien jongen maar wel un dooien. Echt kwekersleed…

Goed goan,
Martien, de Platschriever uut Loenen

Ie kunt drie keer vallen a’j maar vier keer opstoat

Lees ook

Een Stief Kwartiertje: Spagaat

Een van de grootste uitdagingen waarvoor de mensheid zich in de komende decennia gesteld ziet, …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.