Home / Alle-Regiobode / Foi,foi: Burenhulp..

Foi,foi: Burenhulp..

A’j in de tied terugge klek bint d’r in elke streek heel bekende, soms ok beruchte personen ewes woar nog regelmatig oaver wördt eproat. In alle darpen waren en bint die d’r nog altied. Vake kleurrijke figuren die in de darpen oaverbekend bint ewörden.
Zo’n keerl was ok Johan (ze zeien altied Jehan) Buutenhuus uut Klarenbeek. Un grote forse keerl die meestal goed te passe was. Ik denke dat hee misschien de bekendste en actiefste Klarenbeker is ewes. Hee hef wel un standbeeld verdiend. In zien lèven hef hee veul veur de Klarenbeekse darpsgemeenschap edoan. Veural ut Apeldoornse deel van ut darp…
Buutenhuus was annemmer. Un huuzenbouwer. D’r waren toen gien computers en andere apparaten um alles uut te rèkenen wat ut mos kosten. Achter op de sigarendeuze kon Jehan krek uutrèkenen wat ut huus of verbouwing ging kosten. Un sigare roken hee altied.
Jehan had un groot gezin, maar hee deed nog veul meer. Hee was ok gemeenteroadslid. Hee deed zien woordje meestal gewoon in ut plat. De luu begrepen ut best. Hee had d’r altied veul humor bie. Hee kon ut bar mooi vertellen. Maar d’r wörden wel naor um eluusterd en kreeg veul veur mekaar.
Jehan was ok een van de eerste mensen van de christelijke muziekvereniging Wilhelmina. Joarenlang is hee veurzitter ewes. Later bint ze samen egoan met Amicitia en heet noe de Muziekvereniging Klarenbeek.
Jehan was toen ok oprichter van de dialectclub uut Klarenbeek. Ut behoud van de streektaal ging um an ut harte. De leden schreven af en toe un mooi verhaaltjen. Van Buutenhuus kwam ik un leuk verhaaltjen tegen. Of ut ok echt gebeurd is weet ik niet.
Ut geet oaver burenhulp. Wule nuump ut in disse streek gien naoberhulp. Buutenhuus schreef: ”Vader Gaart en zien zoon Chris waren samen noa ut bouwland egoan um mais te kneuzen. Tegen de midddag was ut zovarre dat ze de wagen vol hadden en noa huus wollen om te lössen en wat te èten. Zoon Chris reed op de trekker maar nam de uutrit van ut land nao de weg te krap en ut gevolg was dat de wagen met mais umme kieperen en onderste boaven lag.
De buurman, die ezeen had wat doar gebeuren, ging d’r hen. Hee zag dat de jongen kats beduusd stond te kieken noa de ravage. Toen de buurman alles un bitjen had bekeken zei hee tegen Chris: “Loat mar liggen Chris en goa eerst maar is met mien mee um un stuksien te èten en dan help ik oe straks effies um de pruttel weer oaverende te zetten”.
“Das wel aardig van oe buurman”, zei Chris, “maar ik denke dat mien vader dat niet zo leuk zal vinden”. “Kom maar mee”, zei de buurman,”en dan kieke wiele straks wel wieter”. “Dat mot dan mar”, zei Chris, “maar ik wete heel zeker dat vader slecht te passe zal wèèn”. Weurumme zal oe vader noe dan echt kwoad wèèn?”, vroeg de buurman, “ik heb um hier nog niet ezeen”.
“Doar geet ut noe krek umme”, zei Chris, “want mien vader lig nog altied onder de wagen…”. Noe wis de buurman genog!!

Goed goan,
Martien, de Platschriever uut Loenen

Bèter spiet van wa’j heb edoan, dan van wa’j niet heb edoan

Lees ook

Business & Shopping: Corbeek Tweewielers viert jubileum met E-bike Opstapdagen

DIEREN – Het is al weer 12,5 jaar geleden dat Michel Corbeek zijn eigen zaak …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.