Home / Alle-Regiobode / Foi, foi: Moeilijk

Foi, foi: Moeilijk

Ut is bar moeilijk de jeugd van tegenwoordig wat uut te leggen. Want ze weet ut allemoal zo goed. Ie hoef noe niet meer te proaten oaver ‘de bloemetjes en de bijtjes’ a’j wat wilt vertellen oaver de voortplanting van de mens. Vrogger mos de jeugd zelf alles maar uutvinden woar ut jonge lèven in de wiege vandan kwam. D’r worden de wonderlijkste verhalen verteld. Achteraf snap ie niet da’j dat vrogger allemoal heb geleuf. Maar ja toen ha’j nog ontzag veur de olderen. Wat oe die vertellen dat geleuven ie toch allemoal. Dat de ooievaar ut jonge spul bracht dat was moelijk te snappen.
Och, ja en dan wörden d’r verteld dat de vroedjuffer ut kind had mee ebrach. Ok zo raar. Weurumme kwam zee bie sommigen huusholdings elk joar en bie wat adressen wol zee maar niet kommen met heur koffertje. Ra, ra hoe kon dat noe? En vremp was ok dat iedere keer as d’r wat jongs in de wiege kwam de moeder van de trappe viel en un paar dagen in berre mos blieven. En dan liep d’r altied zo’n vremde zuster rond die ut èten koaken en veur moeder en kind zörgen.
Tegenwoordig proat ze veul meer met de kinder. En ze ziet natuurlijk ok veul meer op de televisie, tablet of telefoon. Ze ziet van alles , mooi en lillik. Vake teveul.
Maar hoe mo’j noe sommige dingen uutleggen an de jeugd die meent van alles al te weten. Ik dach doar an toen ik pas elejen in un tuincentrum was. Ut is doar altied druk. Bie de bloemenafdeling is ut ok altied mooi. Bie un hoekjen met heel veul soorten cactussen en vetplanten raken ik an de proat. D’r was un jonge moeder druk aan ut zuuken tussen de mooie plantjes. Keuze zat. De moeder had twee kinderen bie heur: un zoontje van un joar of zesse en een wat groter van un joar of tiene. De moeder was druk an ut zuuken tussen vetplantjes, maar de oldste zoon vond de cactussen veul mooier. D’r bint soorten die bar grote stèkels heb. A’j doar in de woestijn met de konte invalt he’j wel un groot probleem. De jongen vuulen is goed aan die stèkels en schrok d’r wel van dat die zo alderbastend scharp waren. Hee vuulen is an de verschillende catussen woar die stèkels aanzatten. Hee snappen niet dat ut zo kon gruuien. Hee vond ut heel mooi. De moeder kwam d’r noe ok biestoan en zei dat de cactussen zo mooi waren en zulke mooie (latijnse) namen hadden. Toen vertellen ik heur dat een van die nogal platte cactus met veul doorns un mooie (passende) bienaam hef. “O ja, zei ze, “wat dan”?. Ik zei heur; “Dit soort wördt ‘schoonmoedersstoel’ enuump”. Zee mos d’r bar umme lachen. De zoon stond d’r bie en wol krek weten wat ik ezeg had en weurumme die plante zo heten. De vrouw hef un beste tied neudig ehad um dat uut te leggen. Ik was al varre weg en toen was ze nog an ut vertellen. Soms kan ut lèven wat ingewikkeld wèzen veur de verstandige jeugd…

Goed goan,
Martien, de Platschriever uut Loenen

Gien mense is gelukkig zolang hee zelf niet vindt dat hee ut is

Lees ook

Business & Shopping: Nieuw verplicht energielabel vanaf 1 januari

DIEREN – Iedere woningeigenaar is op straffe van een boete verplicht om bij de overdracht …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.