Home / Alle-Regiobode / Foi, foi: Bekeuring of?

Foi, foi: Bekeuring of?

Foi, foi: Bekeuring of?

Vanmargen kreeg ik op de markt een complimentjen veur disse stukjes. Toch leuk! Dat dut mien goed want is is un hele toer um elke wèke weer wat te bedenken. Ie mot de ogen en de oren goed lös hebben anders vang ie niks op. Maar ut meeste wa’j heurt is niet geschikt veur dit huuksien. Ut is soms te onbenullig of niet arg netjes. Ut mot wel leuk blieven. Maar a’j wat weet of heurt, loat ut mien effen weten: bellen, mailen of schrieven. Toch mooi a’j oe verhaaltjen hier weer lèèst.
Zo heuren ik laats van un goeie bekende wat hee un tiedjen elejen had mee emaak. A’j un bekeuring krieg he’j doar altied de pest oaver in. Zunde van ut geld en tegenwoordig bint ze niet mals met de bedragen. Um wat te nuumen: a’j gewoon argens achter un boom stoat te pissen, maak niet uut woar, dan kunt ze oe al un bon geven veur wildplassen. Toch un raar woord eigenlijk. Maar zo’n boete kan wel meer dan tweehonderd euro kosten. Toch wel un duur plasjen…
Un bekeuring kriegen is altied arg vervelend. Maar ok as un ander oe wat trammelant bezorg. Ik heuren un verhaaltjen (ik denke niet echt gebeurd) dat iemand op un marktplein un auto wol parkeren. Dat ging niet helemoal goed. Jammer hee maken un dutte(deuk) in ut spatbord. Sommige luu trek zich nargens wat van an, maar hee pakken un briefien en schreef doar wat op en deed dat achter de ruutenwisser. Mensen die dat zagen dachen: wat un nette keerl is dat. Maar toen de eigenaar van de auto wat later kwam opdagen zag hee de dutte en ut briefien. “Mooi”, dach hee, “de dader is bekend”. Maar.. wat las hee op ut briefen: ”Jammer. Er kijken veel mensen naar mij en denken dat ik mijn naam en adres hier opschrijf maar dat doe ik toch maar niet.”. Wat had de man de pest in.
Meer geluk had un man die op un snelweg tegen de lampe reed toen hee veuls te hard reed. Ja, ie kunt dan wel zo’n gloepens hoast hebben maar ie mot oe wel hollen aan de snelheid die doar geld. Maar sommigen meent dat ze onder en boaven de wet stoat. Maar zo is ut niet. Gewoon oe an de regels hollen dan gebeurd d’r niks. Maar dat harde jagen kunt sommigen ok niet loaten. Veural a’j veul op de weg zit en a’j argens op tied mot wèzen. Maar Willem had gien hoast maar hield d’r gewoon van um fors deur te riejen. Verduld doar zag hee de bekende politielampen. En ja heur, hee was de klos. Ze hadden deur dat Willem te hard had erejen. De agenten staken de hand op en Willem mos stoppen. Maar wat zag hee doar bie de agenten?. Verduld un goeie bekende van um van de biljartclub. Ja, die deed maar krek of hee um niet zo goed kennen. Hee most op de bon. Willem de pest in. Juust van Gerrit un bon. Hee kreeg vermanende woorden en un briefien. Hellig ging hee de auto in en wol toch zien hoe groot de bekeuring was. Maar wat stond d’r op ut briefien. Maar een woord(sorry veur dit woord): ‘klootzak’. Ut maken meteen bie um alles duudelijk …

Goed goan,
Martien, de Platschriever uut Loenen

De grootste fout die’j kunt maken is um d’r giene te maken

Lees ook

Een Stief Kwartiertje: Het spel

Eerdaags komt het spel op de wagen. Deze uitdrukking stamt uit de zestiende eeuw toen …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.