Home / Alle-Regiobode / Foi, foi: Slim

Foi, foi: Slim

In ansluuting op mien veurige verhaaltjen oaver Oaverluuden nog wat anders dat ik pas elejen nog heuren. Ut hef ok met klokken te maken. Mooi um te heuren dat d’r nog vernemstige mensen bint die oaveral un oplossing veur weet. Dit keer geet ut oaver un handige keerl. Ik zal um maar Jan nuumen. Hee hef un goed technisch baantje op een van de fabrieken. Ze kunt um doar niet missen, want d’r is nog wel is trammelant met die machines en de zaak mot toch goed aan ut dreeien blieven. D’r mot wat verdiend worden.
In zien vrië tied is ut ok un bezig baasjen. Hee maak muziek met un band van zeuven jongens. Dat dut hee al joaren en oaverval is hee al ewes. Hee weet met zien jongens de stemming d’r wel in te brengen.
Maar Jan kan nog heel veul meer. Bie zien club kan hee ok bar goed toneel speulen. Dat zit in zien bloed, in zien genen zek ze dan. Zien moeder speulen ok de sterren van de hemel. Ut kon niet gek genog goan. Wat heb d’r in hoop mensen van kunnen genieten. Ze kan noe niet meer zo best maar hef wel bar mooie herinneringen aan die tied. Jan bleek ok goed te kunnen speulen. Ut maken niet uut of hee zwarver was of un net keerltjen. Hee zetten dat krek neer. Maar bie ut toneel heb ze soms wat effecten neudig. Niet alleen un belle of wat onweer en règen, maar ut kan soms van alles wèzen. Doar had Jan ok gien moeite mee. As ze dat graag wollen maken hee dat veurmekaar. Wat veur geluud of ut ok was.
Maar Jan hef met zien technische snufjes de luu uut ut darp mooi veur de gek ehollen. Mo’j is heuren wat hee hef edaon… Ut bestuur van de karke was d’r heel blie mee en proat d’r nog wel is oaver.
Ut is al effen elejen toen de toren van de olde karke hard nodig un opknapbeurte mos hebben. De olde gebinten wörden gammel. Weer en wind heb d’r vat op en dan geet ut slieten. Ut was niet meer verantwoord dat de klokken nog beieren doar boaven in de toren. De köster die af en toe in de toren klom zei ut al tegen ut karkbestuur dat d’r wat an mos gebeuren. Maar ja dat kost heel wat geld. Ut duren wel effen en toen kon de klus toch beginnen. Maar toen was d’r weer un ander probleem. D’r kon un tiedjen niet meer eluud wörden. Veural bie begrafenissen en trouweriën was dat jammer. Iemand van de karkeroad sprak Jan toevallig en die zei meteen dat hee d’r wel un oplossing veur wist. “Hoe dan”, vroeg de man, “wat wol ie dan doen”?”. Jan zei: “Nou gewoon. Ik nem ut luuden van de klokken op, op un band. Ik goa luudsprekers plaatsen in de toren en met un verstarker kun wie gewoon ut luuden loaten heuren”. “Verduld”, zei de man, “dat is un mooie oplossing want zonder klokkengebeier is ut ok maar un dooie boel.” Jan hef ut in orde emaak en niemand in ut darp hef ooit emark dat de klokken buuten gebruuk waren esteld. Toch mooi edoan van die slimme Jan.

Goed goan,
Martien,
de Platschriever uut Loenen

Wie goed kan lachen, is un goed mens

Lees ook

Rick Evers: Flauwekulrecord

De 34-jarige Keniaan Eliud Kipchoge liep afgelopen week als eerste mens een ‘marathon’ onder de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.