Home / Alle-Regiobode / Foi.foi: Oaverluuden….

Foi.foi: Oaverluuden….

In de darpen van ons grote lèzersgebied wördt nog grote weerde gehecht an olde tradities. Veural waren d’r vrogger veul tradities bie ut starven van iemand uut de buurte. Ja, de buren waren d’r maar druk mee. De buurvrouwen hadden un taak in ut huus. Veural met de dag van de begrafenis. Noa de uutvaart kwamen ze allemoale weer noa ut starfhuus en mossen dan koffie met breudjes hebben. Soms deden ze ok nog un borrel noa. De keerls mossen dragen. Deurumme mos ie ok acht buren hebben anders kwam ie dragers tekort. Soms mossen ze un beste ende d’r mee dragen.
Veul van die olde tradities bint d’r niet meer. Buren heb gien taak meer. Uutvaartbedrijven bint d’r noe heel veul. Die regelt alles. Ie kunt ut heel sober kriegen maar ok heel royaal, wat de noabestoanden maar wilt. Ze kunt ut regelen. A’j de knippe maar trek, want is ut allemoal nogal duur.
Karkelijk is ut ok heel anders ewörden. Vake bint d’r gien diensten meer. Wat noe nog wel weer in ere is esteld bie un starfgeval, dat is ut oaverluuden(overluiden). Vrogger deden ze dat altied as d’r iemand was oaverleden. As de mensen in ut darp heuren dat de klokken beieren dan vroegen ze zich af: wie is d’r dood. Vake worden dat al snel in ut darp verteld. Iedereen kent toch iedereen!
Un tiedjen is dat niet meer in gebruuk ewes. Maar zoas dat geet met sommige olde gebruuken dachten ze in Loenen d’r oaver um ook ut luujen van de klokkem bie un starfgeval weer te goan doen. De beide karken heb d’r mensen veur die dat netjes doet. Kenners kunt an de klokken krek heuren van welke karke dat is. De Protestantse karke hef un wat zwoarder geluud as de katholieke karke. Alle klokken heb schienbaar un ander geluud. Vrogger worden d’r wel is ezeg as d’r wat langer worden eluud: “D’r is zeker iemand die veul geld hef dood.”
Maar kort elejen ewas d’r un probleem bie ut luujen van die klokken. Hoe kwam dat zo? Un paar moand stond de toren van de karke in de steigers. D’r was deur ut karkbestuur met de bouwers af esproaken dat bie begrafenis of andere plechtigheid ut wark effen stil worden elegd. Dat ging altied prima. Tot op un dag de klokkenluuder noa de karke mos veur ut oaverluuden umdat d’r weer un dooien was. Maar d’r waren keerls boaven an ut wark, die mossen weten dat ze effen mossen stoppen. In de toren zollen ze zich doodschrikken. Dat gaf problemen want hee kon ze dat niet an ut verstand brengen. Ut waren Poolse arbeiders die de steigers mossen afbreken. Hoe de man ok proaten en gebaren ze snappen d’r gien bal van. De man dacht: doar mot ik wat anders op verzinnen. Het tekende op un stuk papier un klokke die op tien uur stond. Doarmee noa die arbeiders en wees noa ut papier en zei: “klokken bim-bam”. En deed de nodige gebaren d’r bie. Ja, toen begrepen ze ut krek en gingen d’r bie zitten. De man kon luuden. Zo zie’j mar weer: soms krieg ie un ingeving van boaven.

Goed goan,
Martien,
de Platschriever uut Loenen

Ut strand van ut leven hef un eb en vloed…

Lees ook

Tentoonstelling Cor Stoel in de Oranjerie

DIEREN – Cor Stoel uit Eerbeek laat in de Oranjerie in het Carolinapark in Dieren …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.