Home / Alle-Regiobode / Foi, foi: De glazen kaste

Foi, foi: De glazen kaste

D’r bint un bult mensen die van alles en nog wat spoart. Ut is un leuke bezigheid woar menigeen bienoa dag en nacht mee bezig is. D’r bint mensen die spoart eierdoppies of vingerhoedjes. Dat is wel un hobby woar weinig ruumte veur nodig is. A’j wat heb dat groter en arg mooi is, dan zuuk ie un kaste woar de modelauto’s of ander mooi spul in kan. Die glazen kasten, ze nuump ut ok wel vitrines, bint doar arg veur geschikt.
Un vrouw in disse streek, ik nuum heur Truus, had un hobby met ut spoaren vam die kleine koppies en schöteltjes. Ze nuump dat wel koffiekoppies. Leuke hobby. In heel veul landen ku’j die kopen. Sommige spoaders heb doar honderden van. In alle kleuren en opdruk. Prachtig mooi porcelein en ut kost nog wel un paar cent.
Gerard Uwland vertelt in De Moespot wat d’r kan gebeuren a’j gangs goat met zo’n verzameling. Wel heel goed oppassen. Ut is veur Jan kats verkeerd af elopen… Truus had al un hele tied zitten drammen dat d’r un kaste mos kommen veur de koppies. Ze stonden en lagen noe oaveral in huus, in de kasten, dressoir, in de klokke en vensterbanke. Truus had d’r oge veur um de koppies te kopen via internet. D’r waren alderbastend mooie dingen bie. Jan had un paar vrieje dagen ze besloaten um de kringloopwinkels af te goan. Doar mos zeker wel wat stoan. Nou dat viel niet mee heur. Kasten genog, maar niet wat ze zochten. Ja, eindelijk noa de vierde Kringloopwinkel vonden ze wat ze zochten. Wel un bitjen te duur. Jan betalen d’r veertig euro veur. Un mooie kaste met glas, schappen en spiegels. Truus was d’r arg blie mee. ‘s Middags heuken Jan de aanhanger achter de auto en gingen ze de kaste halen. Veurzichtig met Truusut ding uut mekare ehaalt en toen op huus an.
In de hal van hun huus mos de kaste stoan. Truus vond dat un mooie plekke, dan kon de visite meteen heur mooie verzameling zien.
Samen gingen ze de kaste weer in mekare zetten. Wel un hele klus maar tevrèden waren ze d’r niet oaver. Ut boavenste schap lag niet helemoal zuuver. Truus zat d’r steeds oaver te drammen. Jan balen doar oaver. Truus wol de kaste toch wel gebruuken en ze halen de koppies oaveral vandan. Ut stond bar mooi. Ut glimmen en flonkeren van alle kanten in de spiegels. Truus was d’r noe wel tevrèden mee maar ja, dat boavenste schap. A’j goed keken zag ie ut niet zo en zee zei dat Jan d’r mar niks meer an mos doen.
Toch leek Jan dat veur gien meter en ging de volgende dag gangs met de kaste. Veurzichtig proberen hee de glasplate lieke te leggen. Maar o jee, ut ging kats verkeerd. De plate schampen d’r af en donderden met geweld noa beneden. Alle schappen en koppies en schöttels meenemmen in de val. Wat un ravage… Gelukkig was Truus niet in huus. Rap ging Jan nog de winkel um weer glasplaten te halen. Wat Truus hef emopperd toen zee thuus kwam loat zich roaden. Een ding was noe zeker, zee had weer volop ruumte veur heur nieuwe koppies.

Goed goan,
Martien, de Platschriever uut Loenen

Geluk maakt niet alleen gelukkig

Lees ook

Ik vind: Ontbijten bij McDonald’s

Beste Rick Evers, Iedere dinsdagavond verheug ik me op mijn Regiobode! De enige papieren krant …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.