Home / Alle-Regiobode / Foi, Foi: Alles tellen

Foi, Foi: Alles tellen

Pas elejen was ik an de proat met un paar mensen die druk an ut wark waren in un tuincentrum. Foi,foi wat mot die luu doar, elke keer as d’r un ander seizoen kump, flink aan ut wark. Pas elejen nog met de Kasmis. Eerst dat opbouwen. Alles uut de deuzen en buulen. Ut wördt wel elke keer bar mooi.
De luu bint nauwelijks bekommen van al die drukte en noe mot ze al weer gangs met un alderbastend grote klus. D’r waren op die dag apart veul luu an ut wark doar. En druk dat ze waren. Ok niet an ut Kasmisspul opruumen, maar ze waren an ut uutzuuken of wat anders. Ik vroeg an un man wat ze doar toch an ut doen waren. Nou toen kreeg ik mien toch un verhaal. Ondertussen warken hee gewoon deur. Dat mos ok wel, anders kwam ut wark niet op tied kloar.
Hee deed mien uut de doeken woar ze mee bezig waren. Ik kon ut hoast niet geleuven, maar ze waren alles, maar dan ok alles an ut tellen. Inventariseren. Ze nuump dit ok wel balansen. De belasting wil krek weten wat d’r allemoal in die hele zaak steet. En a’j rond kiek dan bint d’r gloepens veul. Alleen in die dierenafdeling waren d’r al meer dan twintigduuzend verschillende artikelen. De man was bezig in grote bakken de (kunst)hondenbotten an ut tellen. “Ja”, zei de man, “dat mot allemoal eteld wörden. Wie bint hier met zo’n zeuventig man bezig. Ut mot vandage allemoale kloar, ok al wordt ut tien uur. Alles maar dan ok alles mot deur onze vingers. Grote dingen as hier die kussens geet nog wel maar ie heb ok veul van die kleine pruttel ok al kost ut maar ene cent. Goa d’r mar is an stoan. Ie meug ut zeker niet in de roeze doen, want d’r kump un starke controle op. De belasting stuurt margen un man die ze un account nuump. Dat is in alderjekes secuure keerl. Die geet natuurlijk niet alles noatellen maar hier en doar prik hee d’r wat uut en dan mot ut krek kloppen. A’j dat niet goed heb edoan val ie deur de mande en dan bint de eerpels gaar. As d’r un paar proeven niet goed bint dan loat ze oe de hele afdeling weer oaver doen. Dan baal ie wel effen want zo fijn wark is ut niet. A’j un bitjen un lastige keerl tref en oaveral wat weet te vinden dan kan de belasting oe opleggen um de hele zaak opnieuw te tellen, Wat kost dat wel niet”.
Veul keerls, maar ok vrouwen bint d’r druk mee. Ik kon snappen dat ut tellen op de schappen en vloer wel geet. De spullen heb allemoal un aparte (bar)code. Alles krek alles mot eteld wörden. Ok ut lèvende spul. Ik vroege de man hoe hee dat met de vissen deed. Mot ze dan allemoal effen stille liggen?. “Nou”, zei de man, “wule probeert dat ok wel secuur te doen. Wule goat d’r veur zitten en telt ze netjes. Wel drie keer want ze zwemp allemoale deur mekare. Elke keer un ander getal. Wule nemp dan ut gemiddelde. Wule hoap alleen dat ze vannacht gien jongen krieg, want klop ut margen niet meer. Maar ja, ut geet met zoveul dingen, ie mot d’r un bitjen geluk mee hebben….”

Goed goan,
Martien, de Platschriever uut Loenen

Met stenen bouw ie un huus en met liefde un thuus….

Lees ook

Foi, foi: Wildplassen

Mo’j is heuren wat ze mien vertellen oaver un wildplasser… Derk had un goeie kennis. …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.