Home / Alle-Regiobode / Foi, Foi: Oorbellen

Foi, Foi: Oorbellen

Oorbellen bint misschien wel de oldste versierselen bie un mens. Bienoa altied heb mensen oorbellen ehad. Kiek maar is noa de bevolking in Afrika. De bosnegers, indianen en anderen liepen toen al met grote oorringen, botjes en wat al niet meer d’r in.
Vrouwen heb altied oorbellen in ehad. Mannen ok wel. Maar niet zoveul. Op olde foto’s ziej nog wel keerls met zo’n oorring in. Weerumme ze dat deden weet ik krek niet.
Tegenwoordig kunt de vrouwluu niet meer zonder. De oorbellen, oorringen en wat al niet meer wördt steeds groter en bonter. De jongens begint d’r ok mee. Veural dat hippe spul. Ze heb d’r oorringen of knoppen in. Ut kan allemoal.
Vrouwen die bar sjiek wilt wèzen heb grote ballen van oorbellen aan de kop. Soms bint ut sierroaden die un bult geld heb ekost. Ie hold ut soms niet veur meugelijk dat ze zulke zwoare dingen aan die oorlelletjes heb hangen.
Noe is d’r van alles te koop, maar vrogger wollen de deerns mooi wèzen met oorbellen en armbanden. Ja, die armbanden was gemakkelijk an te doen, maar die oorbellen niet. Un paar Loense jonge deertjes van zo’n joar of twaalf wollen d’r graag bie heuren en kregen noa veul gedram die mooie oorbellen. Ze vonden dit wel arg mooi. De vriendinnetjes hadden toch wel un probleem. Hoe mos dat noe met de gaatjes in de oren? Ze wollen d’r ok niet mee noa un winkel of dokter toe. Maar ja, die glinsterende oorbellen waren toch zo bar mooi en ze wollen ze zo graag in hebben um dit hun schoolvriendinnetjes te loaten zien.
Een van de beide deerntjes had un breur die oaveral road op wist. Hee was un stuk older en kon van alles. Dat bleek ok wel dat hee knap vernemstig was, wat hee hef in zien lèven um mooi bedrief op ebouwd. Zien zoons heb dat varder deur ezet.
Hee heuren de problemen van zien jonge zusjen en heur vriendin. Wat noe te doen? Hee zag ze proelen en zei tegen hun dat hee dat wel effen zol fiksen. In de neeideuze van zien moeder halen hee un stopnoalde. Hee wist wel da’j dat steriel en heite mossen maken. Hee zei tegen de deerntjes dat ze an de keukentoafel mossen goan zitten. Bie un gasvlamme maken hee de noalde gluuiend en toen d’r mee noa de deerntjes. Die waren eerst wel bange dat ut zeer zol doen maar dat viel bar mee. In de oorlellen zit niet veul gevuul. Ja, heur ut lukken heel goed. Effen later de oorbellen passen en alles was kloar, zonder piene. Wat waren de deerns greuts op de oorbellen.
Wat joaren later wol ut zusjen nieuwe oorbellen in hebben en ging doarveur noa de winkel. Ze zoch nieuwen uut en de man wol ze effen indoen. Hee keek en loeren en vond ut wel raar. Hee vroeg wie de gaatjes d’r in had emaak. “Hoezo”, zei ut deerntje., nou zei de man, “ik zie dat de gaatjes niet op dezelfde heugte zit en dat heurt wel zo”. En ja toen mos zee wel bekennen dat heur breur dit klusjes had edoan. De winkelier mos d’r bar umme lachen. Nog vake is dit deurverteld…

Goed goan,
Martien, De Platschriever uut Loenen

Iets negatiefs hef altijd ok wat positiefs

Lees ook

Een Stief Kwartiertje: Gezonde leefstijl

Gezondheid wordt over het algemeen gezien als de belangrijkste factor voor een goed en gelukkig …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.