Home / Alle-Regiobode / Foi Foi: Chinees…

Foi Foi: Chinees…

Chinezen bint in onze darpen gien vremden meer. e komp ze oaveral tegen. Steeds meer, want d’r bint al heel wat cafetaria’s oaverenommen deur Chinezen. Joaren elejen kwamen ze ok vake langs de deure om wat negotie te verkopen. Ze nuumen dat ok wel kissieskeerls. Ze bellen huus an huus an met un grote kiste met laadjes d’r in. Van alles ko’j d’r bie kopen: kleedjes, knopen, eerpelschelmesjes maar ok elastiek.
Frans van Sparre hef vrogger ok te doen ehad met Chinezen en hef door un verhaal oaver verteld. Op un dag kwam d’r un Chinees bie Hendrik op de boerderië an de deure. De man had gien pinda’s bie zich maar wel stropdassen en kleine kleedjes. Hee kloppen an de deure en liep metene noa binnen. De boer zei um dat hee gien dasse nodig had. Hee dragen altied boezeroens(soort oaverhemd). De Chinees keek wat ongelukkig en zei zoiets van: “Ik moet ook leven”. Hendrik had wat medeliejen met de man en vroeg um of hee of koffie wol hebben. Jazeker,dat wol de man wel. Ut was kold en rot winderig weer. Hendrik zetten de man un komme koffie veur met un stuk Dèventer koeke die bie. Hendrik nam zelf ok un komme en deed de pruumtabak (woar heel altied op kauwen) uut de mond en lei die neer op de hoek van de toafel.
Un grote panne met arwtensoep(snert) stond te pruttelen op ut fornuus in de keuken. De man keek steeds noa de panne want ut roak arg lekker. Hendrik had wel is eheurd dat Chinezen rare kostgangers bint en honden en katten èèt. Ok wel sommige veugeltjes. Hendrik kon ut niet loaten um te vroagaen of de Chinese koopman ok un komme arwtensoep lusten. O ja, de ogen van de bezoeker begonnen te glimmen. Dat lusten hee wel. Hendrik scheppen wat in de komme um dit de man te loaten pruuven. Hee keek wat raar maar ut smaken um toch goed. De man vroeg nog wel an de boer: “Heb ie ok sambal?’. “Nee”, zei de boer, “dat ken ik niet, maar ik heb wel zolt, pepper, muskaat en andere kruuden”. Hee halen dat veur de dag en zei tegen de Chinees: “Zuuk zelf maar uut wa’j wilt hebben”. Nou, dat deed de man. Hee deed d’r van alles in. Hee at ut allemoal smakelijk op en smakken d’r flink bie. Wel un bewies dat um ut lekker smaken.
Opens worden d’r eklop an de dèledeure. De boer zei tegen de man: ‘D’r is volk achter. Ik mot effen kieken wie d’r is”. Mar toen hee terugkwam in de keuken was de Chinees helemoal foetsie. De leuge komme arwtensoep had hee netjes in de afwasbak op un aanrecht ezet, maar wat ok weg was? Dat was de proppe pruumtabak van Hendrik. Verduld de Chinees had dit ok mee enommen. Hendrik had ut zelf nooit geprobeerd um arwtensoep met pruumtabak te èten. Wel had Hendrik wel is eheurd dat as Chinexen un glas bier opdrink en d’r valt un vliege in, dat ze ut bier met vliege gewoon opdrink. Nee Hendrik, deed dat anders. Eerst de vliege d’r uut halen en dan ut bier opdrinken. Hee vindt de Chinezen nog altied wel aardige mensen maar an sommige gewoonten van deze mensen kan hee niet wennen….

Goed goan,
Martien, de Platschriever uut Loenen

A’j goed tegen oe verlies kunt ku’j enkel maar winnen.

Lees ook

Foi, Foi: Verzoapen fietse

In de vakantietied gebeurt d’r altied van alles. Ieder joar heur ik weer verhalen. Op …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.