Home / Alle-Regiobode / FOI FOI: Bruune geiten…..

FOI FOI: Bruune geiten…..

Dat ut vrogger niet zo’n beste tied was, is algemeen bekend. D’r mos hard aan epak worden um de kost te verdienen. Johan Wansink vertellen mien doar un aardig verhaal oaver. Ut ging oaver zien Ome Jaap. In Hoenderloo mos ie, as ie niks hadden eleerd, in ut bos warken of bie un boer an de slag. D’r mos geld verdiend worden. Brood op de planke kommen.
Ome Jaap hef van alles edoan. Hee hef moeflons uut ezet op de Hoge Veluwe bie Kröller Muller. Die beesten waren in ut buutenland ekoch. Die meneer had dat bèter niet an ome Jaap kunnen vroagen, want toen Ome Jaap doar oaver de Hoge Veluwe liep kwam zien streupersbloed weer noar boaven. Ome Jaap kon volgens Johan
alderbastend hard lopen en dat kwam um doar goed van pas. Hee kon de veldwachter altied goed veurblieven.
Bie ut streupen liet hee de reeën hen en weer in een hoek van ut raster lopen van links noar rechts. En dat net zo lange tötdat die dieren zo muu waren dat ze niet meer konden lopen. Jaap hef doar drie reeën met de poten an mekare ebonden en zo ene veur ene met de kruuwagen noar huus ebrach. Hee hef ze doar op de stal ezet en is ze goed goan voeren. De dieren hadden ut doar best. En as ze goed dikke waren kon hee ze mooi slachten. Doar zaten lekkere bouten an. Goed èten veur zien gezin. Niemand kon dat zo zien.
Maar helaas, ut ging toch nog glad verkeerd. Jaap had d’r nooit bie stille estoan dat zien jongens ze hadden ezeen in de schuure. Hee zei maar zo dat ut bruune geiten waren. Dat mos goed goan. De dieren waren al mooi dikke ewörden. Nog effen en dan konden ze in de panne.
Jaap had ut allemoale goed bedacht maar d’r kwam un kink in de kabel. Wat ging d’r mis? Op un dag werd d’r op schole eproat over wat veur dieren ze allemoale thuus hadden. Bie ene un koe, un peerd, bie de ander un paar schoapen, hond, katte of un geite. Een van de jongens had un vroage veur de onderwiezer en zei: “Meester bint d’r ok bruune geiten?”. “Nee”, zei de meester, “bruine geiten bestaan niet”. Zeg dat jonk: ”Maar bie ons wel meester, wule heb d’r drie op stal stoan!”
Dat had de jonge Jaap bèter niet kunnen zeggen, want toen ging de meester, die hartstikke tegen streupen was, un lichien op. De volgende dag ging hee nog de plaatselijke veldwachter. Die vond ut arg mooi dat hee Jaap noe in de krage kon griepen. Al langer had hee d’r op eloerd um disse streuper op heterdaad te betrappen. Umdat Jaap bar hard kon lopen was hee um altied te glad af ewes. Toen hee bie Jaap kwam kon hee d’r niet onderuut um de reeën te loaten zien. Hee was d’r gluuiend bie.
Dat muusien hef nog wel un flinke start ekregen want Jaap mos mee en hef un flink tiedjen in de bak motten zitten. In die tied was dat un grote schande. Volgens Johan is Ome Jaap later toch nog goed terechte ekommen in de maatschappij!!.

Goed goan,
Martien, de Platschriever uut Loenen

Kostbaar is de wiesheid die’j deur ervaring heb ekregen

Lees ook

Business & Shopping: Nieuw verplicht energielabel vanaf 1 januari

DIEREN – Iedere woningeigenaar is op straffe van een boete verplicht om bij de overdracht …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.