Home / Alle-Regiobode / Foi, Foi:Nat maken…

Foi, Foi:Nat maken…

Foi, Foi:Nat maken…

Op ut platteland is ut un goeie gewoonte um bie anschaf van wat nieuws dit ‘nat te maken’. Doar bedoelt ze dan mee dat d’r op edronken mot wörden. D’r kan dan un feestje egeven wörden. Mo’j is heuren wat d’r in disse streek doarmee is gebeurd…

Joop nodigen un stel van zien kameroaden met aanhang uut um zien nieuwe badkamer is te kommen bekieken. Hee was d’r bar groots op dat hee dit veurmekaar had eboks. Alles had hee zelf edoan. En dat veur un kantoorkeerl! De luu waren d’r natuurlijk wel veur te vinden. Ze spraken met mekare af dat ze Joop en Lien un leuk kado zollen geven maar bespraken ok nog wat anders…

Op de bewuste oavond kwamen ze allemoal op de afgesproaken tied bie Joop. Een van de kameroaden mos umlieks effen noa de WC en zag kans um nao de badkamer te goan en doar un deel van de plannen uut te voeren. Wat later gingen ze allemoal noa de boavenste verdieping om te goan kieken wat Joop doar tot stand had ebracht. De keerls vond ut knap edoan en de vrouwen waren helemoal weg van de mooie kleuren en de mooie inrichting. Joop keek wel un bitjen raar dat d’r inens water in de badkuupe stond. “Een van de kinder zal d’r wel wat in hebben loaten staon. Doar zal ik hun wel is op wiezen dat dat niet heurt”, zei hee met un smoesjen noa zien kameroaden.

De gasten deden opvallend nieuwsgierig en wollen krek weten van Joop hoe hee dat bad doar had an ebrach. Ze lieten zich uutvoerig uut de doeken doen hoe ut an eleg had. En ok hoe ut doar onder was edoan. Een van de kameroaden wachen zien kans af en toen Joop zich veuroaver boag om wat bie ut bad an te wiezen kreeg hee un zetjen. Joop kon zich évenwicht niet meer hollen en klabateren veuroaver met zien kleren en al in ut bad. In de val greep hee de dader nog in de kladden maar die kon zich nog net op tied lös maken. Wat hadden ze d’r allemoal un schik umme. Ut was ok um raar gezichte um Joop doar met zien kleren an in ut nieuwe bad te zien zitten.

Joop die wel veur un geintjen in is, klom zeiknat uut de badkuupe. “Ja”, zei een van de gasten, “wiele mossen toch wat nat maken. Wiel wollen un geintjen uuthalen.” “Kan wel zo wèzen”, zei Joop,”maar dat hadden iele toch ok wel met un borrel kunnen doen, maar iele heb ut mooi bedach. Trouwens ut is maar geleend d’r komp nog wel meer feestjes”.

Joop ging noa zien sloapkamer um dreuge kleren an te doe. Hee wist dat hee iets kon verwachen van zien kameroaden want ze hadden altied wat anders in petto. Hee was zelf altied nummer één um iets te bedenken, maar dat ze zo iets zollen doen had hee nooit verwacht. Wat hadde de luu d’r un schik umme dat hun streek richting Joop zo goed was eluk. Ze heb d’r nog menig pilsjen op edronken en de badkamer flink nat emaak…

Goed goan,

Martien de Platschriever uut Loenen

‘Dankbaarheid is niet alleen de mooiste deugd, maar ok de bron van alle andere’

Lees ook

Foi, foi: Bal gehakt

In un gezin in disse streek hadden ze un hundjen. Un leuk beest dat helemoal …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.