Home / Alle-Regiobode / Foi Foi: Lief muusien…..

Foi Foi: Lief muusien…..

Um in ut dialect un verhaaltjen te schrieven is veur de meeste mensen wat moeilijk. Maar ut valt wel mee a’j d’r maar an begint. Bie de dialectclubs bint vake luu die d’r aardigheid in heb um un verhaaltje, al of niet woar gebeurd, te schrieven. Bie de dialectkring Gemeente Epe heb ze ok wat lejen die dat heel goed doet. De veurzitter is Fennie Dekker. Die kan dat ok heel goed en deed mee an un schriefwedstrijd. Zee maken met un leuk verhaal oaver un muusien en won de eerste pries. In hun clubblad De Kroene steed dat verhaalje dat ik ule ok graag deurgeve. Fennie schreef oaer ut muusien in ut dialect van Heerde: “Hoe offe noe achter de koelkaste terecht ekommen was wete wie niet. Ut kan wen dat de katte um binnen ebrach hef en um kwiet eraak is, maar op un bepaald moment hadden wie un muusie in de keuken.
Ut was un andoelijk klein beesie, duudelijk nog un jonkie en hie was nargens bange veur. Wie zagen um de eerste keer toen wie an ut afwassen waren. He klauteren van achter de koelkste tegen ut aanrecht op en liep zo noar ut hoek van ut aanrech woar de fruitschale stond met van allerlei lekkere dinge zoals mais, walneuten en fruit. Wule waren d’r niet bange veur.
Dan zogge hee uut wat um leek en hee liep dezelfde weg weer terugge en verdween achter de koelkaste. Dit herhaalden zich elke dag en wule heb enorm van um genoten. Een enkele keer maakt hee ok wel is de grote oversteek noar de andere kante van de kamer en verdween dan in de enorme grote bloembak van spoorbielzen die wie in de kamer hadden stoan. Doar stond un banenboom in en doar klomme hee soms in. Dat was natuurlijk levengevoarlijk want de katte en de hond huusden ok in de kamer. Wat hew van um genoten zolange as ut duurden want dit kon niet goed goan. Op un oavend kump de heer des huuzes onverwachts thuus en in plaatse datte vanaf de veurdeure de kamer inlop giete meteen deur noa de keuken. “Ik zie een muis”, schrééuwen hee. Want hee kon gien dialect proaten. Wule konden proaten as Brugman maar ut hielp niks, de muus mos evangen wörden. Ziek wauw d’r van. Diezelfde oavond werd d’r un muzenval op ut anrecht ezet met un stuksien keze d’r op. Ik ben d’r ‘s nachts uut egoan en heb un klap op de val egeven en dat hek un paar nachten vol eholden. Elke nach de val weer nie’j op ezet. Op un nacht zat de val opnieuw dichte, maar gien muusien. En die oavond d’r op zak nooit vergèten. Ut muusien kwam van achter de koelkast an estrompeld en zien gebit rammelen en reutelen van alle kanten… Bleek hee met de snuute in de val ezèten te hebben. Zien hele beksie lag uut mekare. Hee kon dus niet meer èten. Noa diep beroad hew toen besloaten daw um uut zien liejen mossen verlossen en dezelfde oavond hew de val ezet. De volgende margen lagge dood op de val. Bie noader onderzoek bleek ut hele beksien kapot te wèzen. Wule heb un vreselijk emis….”

Goed goan,
Martien, de Platschriever uut Loenen

Klagen hef gien zin, doe wat of vergèèt ut

Lees ook

Retrospectief: De herder van De Hoeven

In Beekbergen kennen de ouderen nog het merkwaardige verhaal van de herder van De Hoeven. …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.